Anda di sini

Sarawak deka nyadi nengeri kaya enegi

Advertisement
Abang Johari disempulang (ari kiba) Aziz, Hamid ari (kanan) Abdullah enggau Dr Sim nyekup pasir kelai nasih tanah projek Multifuel Refuelling Station di MJC Batu Kawa ditu, kemari.- Gambar Roystein Emmor
Abang Johari disempulang (ari kiba) Aziz, Hamid ari (kanan) Abdullah enggau Dr Sim nyekup pasir kelai nasih tanah projek Multifuel Refuelling Station di MJC Batu Kawa ditu, kemari. - Gambar Roystein Emmor

Dikarang Rengenyan Labang 

KUCHING: Kepala Menteri Datuk Patinggi Tan Sri Abang Johari Tun Openg madah, Sarawak deka nyadi nengeri ti kaya enegi.

Ku Abang Johari, iya udah bisi perambu dalam timpuh panjai nyentuk taun 2030 nyengkaum bekaul enggau kuasa tau dikena baru.

Ba pengawa beratka enegi ari elekterik ku iya, Sarawak diatu mega ngemeratka hidrogen ungkup jemah ila.

"Nama kebuah kitai ngereja tauka ngemeratka tu? Laban kitai ngasaika kitai bisi pengering ari sukut undang-undang nyaga sereta ngemata gis enggau asil minyak kelimpah ari kuasa ke bisi ba kitai.

"Bekaul enggau enegi ti dikeluarka kitai, ba siti tekad ai ulih ngeluarka hidroelektrik nengah turbin, kedua ngeluarka enegi nengah solar melepung (floating solar) enggau ketiga, hidrogen. Tiga kuasa ulih diasilka ari siti endur.

"Kitai deka nyadi nengeri ti kaya enggau enegi," ku iya ba aum pengarang berita pengerami nasih tanah projek Multifuel Refuelling Station di MJC Batu Kawa ditu kemari.

Bekaul enggau Multifuel Refuelling Station tu, iya madahka ba siti stesyen tu deka bisi empat enegi disediaka iya nya LPG, minyak fosil, elekterik enggau hidrogen.

Pengawa nyendiaka stesyen minyak ke baka tu,ngayanka nengeri bisi visyen timpuh panjai seraya ngemerat enggau nyaga pemeresi rampa menua kena nyeliahka ari ngemansutka karbon, setipak enggau Strategi Ekonomi Pengudah COVID-19 ti ngemeratka ngenanka rampa menua dalam timpuh ke panjai, ku iya.

Isu rampa menua iya nya isu dunya ku iya, Sarawak taja pan nengeri mit tang bisi juluk ba chara ngaduka rampa menua bekaul enggau enegi.

Ukai semina ari sungai tang mega nengah tasik gaga, Sarawak ngena ai tu ngasilka hidrogen nengah proses elektrolisis, ku iya.

Iya enda ngenggaika maya mungkal endang beguna proses ti mar tang nitihka penerang ke dibacha,dalam timpuh panjai iya nya dalam timpuh 50 taun, ungkus proses tu deka nurun.

"Enti ungkus tu nurun, kitai deka nyadi pemansut ngaga  hidrogen ti mayuh. Nya kebuah bisi peminta ari menua luar dekab beranakka puku ditu.

"Diatu, kitai bisi sempekat enggau Jepun, Korea enggau Australia ti deka beranakka puku ngeluarka hidrogen. Aku ngasaika sida tu bisi ngaga pansik lalu sida chukup nemu kitai ngembuan pemansut tu," ku iya.

Hidrogen deka nyadi sebengkah kuasa ti diguna jemah ila nyentuk ke taun 2030 sereta ngagai taun 2050, lalu Sarawak ba jalai ti betul, ku iya.

"Perambu timpuh panjai, stesyen ti baka tu mega deka digaga ba jalai besai enggau jalai tebing tasik kitai, kelimpah ari ba sekeda endur ke bisi disediaka alai ngetu belelak baka ti bisi di Semenanjung baka Petronas lalu ditu bisi Petronas, Shell enggau Petros," ku iya seraya madahka diri udah bisi perambu nyentuk taun 2030.

Sama bisi ba pengerami tu kemari, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Chairman SEDC Tan Sri Datuk Amar Abdul Aziz Husain, Direkrtor Unit Perancangan Ekonomi Sarawak Datu Muhammad Abdullah Zaidel, Chairman PETROS Tan Sri Datuk Amar Hamid Bugo enggau Ketuai Pemesai Eksekutif SEDC Energy Sdn Bhd Robert Hardin enggau sida ke bukai.

Advertisement