Anda di sini

Manyin enda ngenanka kerusi Tebedu ba PRN12

Advertisement
 


SERIAN: Datuk Amar Michael Manyin Jawong ngenukuka iya enda ngenanka kerusi Tebedu ba Pengawa Bepilih Nengeri Ke-12 (PRN12) tu ila.

"Aku udah ngaga pemutus lalu Kepala Menteri (Datuk Patinggi Tan Sri Abang Johari Tun Openg) nerima nya.

"Nya (pemutus) rasmi," ku iya madah ngagai pengarang berita pengudah bejadi 'Kolokium Kepimpinan Pendidikan Serian' ditu, kemari.

Manyin udah nyadi Kaban Kunsil Nengeri (ADUN) Tebedu pengelama 25 taun, kenyau ari taun 1996.

Iya mega udah mangku mayuh bengkah portfolio ba opis menteri lalu ke diatu nyadi Menteri Pelajar, Sains enggau Pansik Teknologi.

Berindik ari pemutus nya, Gabungan Parti Sarawak (GPS) deka engkah orang baru ba kerusi majoriti Bidayuh nya.

Ba Pengawa Bepilih Nengeri 2016, Manyin udah menang ba kerusi Tebedu enggau majoriti undi 6,173 ngalahka chalun Parti Keadilan Rakyat (PKR) Alaex Saben.

Manyin, 76, mega madahka diri enda nesal ati enggau pemutus ti deka ngetu nya, pengudah 25 taun aktif bepolitik.

“Aku enda asa ati, nadai utai ti ngasuh aku nesal. Aku nyurutka diri enggau peneka diri empu, nadai orang mejal.

“Aku udah madahka pekara tu (pemutus enda ngenanka Tebedu) kenyau ari taun siti nyin tadi,” ku iya seraya madahka faktor umur ngujungka iya ngaga penutus nya.  

Ku iya, iya gagit amat ati deka begulai enggau bala uchu iya sereta numbuhka ladang iya enggau mayuh macham utai tanam ti udah diperambu iya. 

“Aku nadai utai nanggul agi lalu deka gawa bekebun, begulai enggau uchu,diatu aku bisi empat iku uchu. Aku bisi kebun rian. maya musim rian tu tadi, tiap hari urung 200 igi buah rian diulih aku,” ku iya.

Berebak enggau nya, Manyin ke mega Mandal Presiden kanan Parti Pesaka Bumiputera Bersatu (PBB), arap amat ati GPS deka menang ba semua lapan kerusi majoriti Bidayuh maya PRN ke-12 ti dijangka diatur bulan baru.

Lapan kerusi majoriti Bidayuh iya nya Opar, Tasik Biru, Serembu, Mambong, Tarat, Tebedu, Kedup enggau Bukit Semuja.

“Enti kita bemain bol, sebedau tama ke dalam padang, kita mesti arapka diri empu.Nya alai, beratika gaya rikod ke sebedau tu, Bidayuh semampai enggau perintah.

“Sida deka bulih pemaik ari ti semampai begulai enggau perintah. Maya era Barisan Nasional (BN), kerusi Bidayuh dimenang BN lalu sida bu lih semua pemaik asil ari begulai enggau perintah.

“Nya alai aku arap amat, ba PRN ke-12, aku pechaya Bidayuh majak mayuh bisi pelajar diatu, sida enda  nempayaka GPS. Sida deka terus begulai perintah. Nya kebuah aku arapa amat, Bidayuh deka begulai enggau GPS,” ku iya.

Iya mega madah, pengundi meda chalun ke ukai semina diempu parti politik tang mega ngembuan penau gawa begulai enggau  komuniti sereta ulih nyaguka tikas pengidup sida.

Ku iya baru, PRN Melaka ti baru aja tembu mandangka pengundi ngenggaika chalun ti merejuk parti sereta beratka diri empu aja.

“Di Melaka, nadai siku pan “engkatak” menang. Nadai siku pan chalun bediri ngatika diri menang.Nya alai ba runding aku, rayat majak pintar diatu. Sida deka meda personaliti, ukai orang ti beratka diri empu aja, tang beratka komuniti enggau parti. Reti nya, kita mesti nyadi kaban parti sereta suah dipeda begulai enggau penyukung. 

“Kedua,kita mega sanggup bekereja begulai enggau komuniti. Ngangkatka tikas pengidup komuniti.Ba penemu aku,rayat pintar diatu.Sida lebih bepelajar enti dibanding enggau 20 tauka 30 taun ke udah,” ku iya.

Advertisement