Dikarang Rengenyan Labang
KUCHING: Penanggul magi sitak Kunsil Nengeri maya pengawa bepilih besai nengeri ke-12 (PRN12) dalam komponen Gabungan Parti Sarawak(GPS) ulih diatur ngena chara berunding.
Kepala Menteri ke mega Chairman GPS Datuk Patinggi Tan sri Abang Johari Tun Openg madah dalam serakup parti tu kebendar nadai penanggul besai laban bepegai ba prinsip kereja dalam siti tim.
Nitih ku iya, mimit aja ke bisi penanggul magi sitak lebih agi ke bekaul enggau penyandang ti ukai ari parti ke ngempu sitak asal, ambika chunto sitak DUN Mambong.
"(Sitak Mambong) Kitai engka bisi penanggul mimit. Ila kitai berandauka (tu).
"Kitai deka ulih mutarka pekara tu. Penanggul engka ari segi personaliti, nya normal.
"Kitai deka ngaga pemutus (DUN Mambong) pengudah berunding. Enda ibuh berumban. Sehari tu baru 23 haribulan,SPR bedau baum," ku iya lebuh ditanya bekaul enggau pekara nya ba aum pengarang berita pengerami nasih tanah projek Multifuel Refuelling Station di MJC Batu Kawa ditu kemari.
DUN Mambong iya nya sitka asal dipenggi ngagai Parti Rakyat Bersatu Sarawak (SUPP) tang penyandang iya Datuk Dr Jerip Susil ari Parti Pesaka Bumiputera Bersatu (PBB).
Dr Jerip masuk PBB pengudah pansut tekala nya ari Parti Sarawak Bersatu nengah surat rasmi kena 10 Julai 2019.
Dulu ari nya Abang Johari madahka GPS ke bisi empat parti komponen iya nya PBB, SUPP, Parti Rakyat Sarawak enggau Parti Demokratik Progresif deka bediri minta pilih ba semua 82 sitak DUN.
Suruhanjaya Pilihan Raya (SPR) deka ngatur siti aum khas bekaul enggau PRN Sarawak Ke-12 kena 24 November 2021 (seharitu).
Sama bisi ba aum pengarang berita tu Chairman SUPP Dato Sri Dr Sim Kui Hian sereta sida ke bukai.