KUCHING: Gabungan Parti Sarawak (GPS) ngaga pemutus engkah beberapa iku orang baru ke mega orang biak ba Pengawa Bepilih Nengeri Ke-12 (PRN12), laban deka meda ketuai nengeri tu bisi juluk sereta nimpai ke mua.
Kepala Menteri ke mega Chairman GPS, Datuk Patinggi Tan Sri Abang Johari Tun Openg (gambar) madahka tu setipak enggau agenda perintah nengeri nempa Sarawak nyadi nengeri ke pemadu maju dalam teknologi ekonomi digital di rantau tu.
Ku iya, dalam era baru, era data nya sebengkah 'bahan api' to patut tau diubah kena ngasilka produk ke bisi rega tinggi ngena teknologi AI (kecerdasan buatan) baka di menua Estonia.
Sarawak ku iya, kaya enggau pemansut data baka tanah, mata panas enggau rampa menua ti tau diubah ngena teknologi ke pemadu baru enggau inovasyen kena ngasilka produk pemakai, penegap rampa menua enggau nyaga pengerai.
"Nya mih kebuah aku ngambi orang biak siku dua ari GPS ba PRN ke deka datai.
"Kami deka engkah (chalun) orang biak (ba PRN12), siku dua laban kami deka meda rintai ketuai ti bisi juluk ati sereta nimpai gaya jemah ila," ku iya lebuh bejaku ba Pengerami Bejadi Kampung Digital ba Taman Industri Teknologi Tinggi Samajaya ditu, kemari.
Ba sebengkah aum media kena Hari Lima nyin tadi, Sekretari Besai GPS, Datuk Seri Alexander Nanta Linggi madahka Parti Pesaka Bumiputera Bersatu (PBB) deka mantaika entara 10 nyentuk 20 peratus orang baru maya PRN12 tu ila.
Nanta ke mega Sekretari Besai PBB madah, nya setipak enggau pengawa ngemaruka parti.
Ku iya, chalun orang baru nya dipelaba ngisi penuduk ti ditinggalka penyandang ti madahka diri deka nyurutka diri ba pengawa bepilih nya ila.
"Beberapa iku chalun orang baru dibantaika kena ngemujurka pengawa ngemaru sereta nampung legasyen penyulut PBB ti nyadi tulang belakang perintah GPS," ku iya.
Berebak engagu nya, Abang Johari madahka Sarawak mesti terit lalu anang mudah ngalahka diri ke pemaik nengeri enggau pengidup rayat jemah ila.
"Diatu kitai bisi wang ti teguh, nya mih dikenangika aku (nya) telengka ngagai jari penyakal...(enti telengka) mati kitai.
"Tu ukai ungkup aku, (tang) ungkup menua. Aku nangika orang luar ti kala madahka Sarawak deka tengkerap dalam timpuh tiga taun laban Abang Jo ngaga bajet RM10 bilion. Udah lebih tiga taun lalu diatu taun keempat (aku nyadi kepala menteri) Sarawak tenda tengkerap, tang penatai pemisi kitai majak nambah," ku iya.
Ku Abang Johari, raban nya papas lalu engka deka mambarka penyerakup rayat awakka Sarawak enda sekering diatu.
"Sida papas, engka deka mambarka kitai awakka kitai enda kering. Anang irau seagi kitai beserakup, kreatif engau ngembuan juluk ati, Sarawak deka semampai kering.
"Raban biak enggau tuai, mesti bekerejasama sereta chakah gawa nuju pengidup jemah ti nyulut, tang kitai mesti terit, anang mudah ngalah, enti kitai tugil, tusah mih kitai," ku iya.
Ku iya baru, iya netapka polisi n yerangkung orang tuai enggau orang dalam pemansang Sarawak.
"Ungkup orang tuai, enti ulih ubah mih diri kita laban kita udah bisi peneleba, lalu ungkup orang biak, ngawakka diri mih belajarka pekara baru laban kita nemu utai ti deka diguna ba era baru," ku iya.