KUCHING: Sarawak berunding deka numbuhka entiti tunggal kena meoptimumka chara ngena pengereja pengawa, sistem meri servis mekal ai ti meruan agi lalu nentu ulih nyendia pemansut ai ke chukup sereta tau dikearapka.
Menteri Utiliti Dato Sri Dr Stephen Rundi Utom madah,perambu ordinan baru ungkup tuju tuju nya u dah dipejuraika dalam Kunsil Nengeri (DUN).
" Entiti baru tu deka ngaga utai ti digaga SEB (Sarawak Energy Berhad) ari sukut mekalka elekterik di nengeri, nya sebaka lalu Opis Menteri beratika pekara nya," ku iya lebuh bejaku ba Pengerami Taun Kelima Penumbuh Opis Menteri Utiliti di sebuah hotel tebilang ditu, malam Hari Enam tu tadi.
Ku Dr Rundi, opis menteri nya mega sedia ngepunka pengawa ngaga Grid Ai di serata nengeri, kena nentu ulih nyendia bekal ai ti tau dikearap, tegap sereta ulih tan di Sarawak nengah Atur Pemansang Malaysia Lumpar Ke-12.
"Kami udah ngaga pansik, Enti kitai ulih engkah bekal elekterik nengah grid, kitai mega tau ngaga pekara ba bekal ai," ku iya seraya m adahka Bekal Ai Alternatif Sarawak (SWAS) deka majak dipejalaika ba k andang menua ti balat jauh.
Ku iya, sistem meter pintar mega sedang digaga nengah chara ngena digital ti nyadi singkang ke mua ungkup Sarawak.
Dr Rundi madah, Opis Menteri Utiliti ti ditunbuhka kenyau ari taun 2016, mengkang relevan sereta mantupka peneka rayat Sarawak ba pengawa nyendiaka bekal ai enggau elekterik, nyengkaum nyadung gis di nengeri tu.
"Mayuh pemar ditapi aku enggau dua menteri muda nyengkaum bala pemesai kanan opis menteri maya opis menteri tu ditumbuhka lima taun ke udah.
"Opis Menteri meri besai terima kasih ngagai Kepala Menteri Datuk Patinggi Abang Johari Tun Openg laban udah ngungkupka RM4 bilion kena mutarka isu bekal ai enggau RM2.37 bilion kena mutarka penanggul bungkur bekal elekterik di serata nengeri," ku iya.
Ku Dr Rundi baru, Opis Menteri Utiliti udah ngelangkar strategi, inisiatif ngenegap enggau pelin kereja seti[ak enggau Strategi Pemansang Pengudah COVID-19 (PCDS) 2030 Sarawak.