SIBU: Semina Sarawak nengeri beranakka puku ba tiga buah universiti peribit, kena nempa mayuh pengereja pengawa ke landik enggau bepenau, kena ngisi guna ba sektor industri di Sarawak.
Sapit Kepala Menteri Datuk Amar Awang Tengah Ali Hassan madah, tiga universiti nya Swinburne University di mengeri besai Kuching, Curtin University di mengeri besai Miri enggau University Of Technology Sarawak (UTS) di mengeri Sibu.
“Laban kitai nemu pemesai guna pelajar ba renggat universiti lalu kami dekaka tetiap iku rayat Sarawak diberi peluang belajar nyentuk ke renggat universiti sekalika di menua tu tauka di menua tasik,” ku iya.
Ku Awang Tengah, endang pekara ti dikemeratka perintah nengeri ngemansangka modal mensia ambika Sarawak semampai bisi raban pengereja pengawa ke bisi pengelandik kena ngisi guna ba industri ti majak ngerembai di Sarawak.
Iya bejaku munyi nya ba pengerami ngelancharka bup “Sarawak Maritime Industries: A Catalyst for Economic Growth” - The Book of Sarawak 2021 ti dikeluarka sechara kerejasama entara Opis Menteri Dagang Antarabansa enggau Industri, Terminal Industri enggau Pemansang Orang Dagang Sarawak begulai enggau Serakup Industri-Industri Maritim Sarawak (SAMIN) ditu,malam Hari Lima tu tadi.
Berebak enggau nya, Awang Tengah madahka industri Konstraksyen enggau ngaga kapal Sarawak udah ngerembai maju sereta mega udah ngena langkar ti inovatif, enggau asil kereja ti bekualiti setipak enggau standard dunya lalu udah mayuh nyaup ekonomi Sarawak.
Ku iya, industri nya ngemansutka eksport sepenyampau RM279 juta ba taun 2018, RM349 juta ba taun 2019 enggau RM260 juta ba taun 2020, taja pan bisi tagang pemindah ketegal pandemik COVID-19.
Iya ke mega Menteri Dagang Antarabansa enggau Industri, Terminal Industri enggau Pemansang Orang Dagang Sarawak m adah, industri maritim nya siti ari pugu pemansang ekonomi Sarawak sereta nyadi komponen ke beguna amat dalam Strategi Pemansang Pengudah COVID-19 2030 (PCDS 2030).
Ku iya,penegap politik ti diasaika Sarawak ari baruh pegai Gabungan Parti Sarawak (GPS) nyadi siti ari pematak pngagai pemeranak puku menua luar, beranakka puku di nengeri tu ti lalu ngenegapka ekonomi Sarawak.
“Taja pan ba maya COVID-19 ngelekai, Sarawak ulih matak RM15.7 juta puku diperanakka ba taun 2020, iya nya kedua tetinggi di Malaysia pengudah Selangor kenyau ari beberapa taun ke udah, Sarawak semampai entara empat palan beranakka teatas di Malaysia,” tambah iya. -- BERNAMA