KUCHING: Pengawa Bepilih Nengeri (PRN) Melaka meri mesej ti nyata ke alai rayat enda nerima budaya engkatak tang dekaka perintah ti tegap.
Kepala Menteri Datuk Patinggi Tan Sri Abang Johari Tun Openg madah, rayat udah leju enggau perintah ti enda tegap.
“PRN Melaka bisi dua iti mesej ti nyata. Keterubah rayat dekaka perintah ti pemadu tegap lalu kedua rayat enda rinduka budaya engkatak.
“Nya kebuah, bisi siti parti kusung. Tang agi ga datai ke Sarawak. Nya alai, kitai patut belajar ari nya nyadi ke malin” ku iya.
Iya bejaku munyi nya ba aum media pengudah Pengerami Nasih Tanah Jematan Sungai Sarawak, Sejingkat enggau Jalai Besai Utama Kedua Kuching-Samarahan ba taba projek di Sejingkat ditu kemari.
Ba PRN Melaka, Barisan Nasional (BN) menang besai, 21 ari 28 kerusi ti ngujungka sida numbuhka perintah Melaka ke baru.
Pakatan Harapan (PH) menang lima kerusi lalu Perikatan Nasional (PN) menang dua kerusi.
Dulu ari nya lebuh ke bejaku bejadi pengerami nya,Abang Johari ti nyadi chairman Gabungan Parti Sarawak (GPS) ke mega presiden Parti Pesaka Bumiputera Bersatu (PBB), madahka parti enda nerima budaya merejuk parti.
Ku iya, iya ngaku dalam sesebuah parti tetap bisi penanggul, tang prinsip PBB enggau GPS endang ungkup rayat, ukai beratka diri empu.
Nya alai ku iya, usul chalun mesti dipansik awakka nadai ari orang ti rindu merejuk.
“Lebuh nyadi ketuai, kami dilatih laban ukai nyamai nyadi ketuai, tangungpengawa besai kelebih agi dalam nengeri ti bisi pepe bansa enggau jalai pengarap, kenti enda dilatih, tau nyadi bisi penanggul.
“Nya alai bisi orang baru, siku dua nya orang biak ba pengawa bepilih ila, lalu sida mesti dilatih,” ku iya.