SIBU: Parti Rakyat Sarawak (PRS) Tamin besedia ngetanka kerusi sitak Kunsil Nengeri (DUN) Tamin maya Pengawa Bepilih Nengeri Ke-12 (PRN12) tu.
Chairman PRS Bagi Menua Tamin Christopher Gira madah, raban bejalaika pengawa kimpin pengawa bepilih PRS Tamin udah besedian kenyau ari setaun ti udah.
“Pengudah DUN direrak maya Jun tu tadi, kitai udah bejalaika pengawa enggau raban ti bekimpin pengawa bepilih. Semua udah sedia betapi enggau pengawa bepilih tu,” ku iya madah ngagai pengarang berita kemari.
Gira ditemu pengudah bejadika Pengerami Nyuaka Anugerah Perkhidmatan Cemerlang (APC) Opis Pelajar Pelilih Menua (PPD) Selangau Taun 2021 di sebuah hotel ditu.
Kerusi DUN Tamin ngembuan lebih 16,700 pengundi enggau 98 peratus iya nya pengundi Dayak.
Kenyau dipilih kena taun 2016, Gira madahka udah bebendar mai pemansang ngagai sitak Tamin baka ti dikedeka rayat.
Tu nyengkaum ngangkatmanah jalai batang, jematan, infrastruktur, kelimpah sektor betanam betupi enggau pelajar.
Bisi 42 iku bala pengajar Selangau udah nerima APC lalu enam iku agi udah nerima tanda basa laban ti udah pinchin ba tauntu.
Sama bisi datai iya nya Pemesai Pelajar Pelilih Menua Selangau Ringgit@Gawan Saut.