SARIKEI: Perintah Sarawak begulai enggai perintah besai udah ngagihka sepenyampau RM407 juta kena nambah manah infrastruktur enggau sistem bekal ai di bagi menua tu.
Opis Bekal Ai Menua Pesisir (JBALB) Sarawak dalam penerang ngagai media kemari madahka, agih belanja tu deka meri pemaik ungkup ngaga 53 buah projek bekal ai ti kuat di bagi menua tu.
Ku iya, pengawa bejalaika projek tu udah dilangkar enggau manah sereta silik ari Opis Menteri Utiliti Sarawak nengah JBALB Sarawak enggau Opis Menteri Pemansang Menua Pesisir (KPLB) Malaysia.
“Pengeransing tu mega nyengkaum pengawa bejalaika 46 Projek Rayat, dua projek ari baruh Atur Pemansang Melaysia Lumpar Ke-11 (RMK11), dua projek KPLB, siti projek SCORE enggau dua projek SAWAS.
“Program ti dipejalaika tu iya nya kena nangkup peminta enggau ngemayuhka bekal ai ti majak nambah di bagi menua Sarikei.
“Di bagi menua Sarikei, naka ke diatu bisi 37 projek ti sepenyampauurung RM30 juta iya nya 34 Projek Rayat, dua projek ari baruh Atur Pemansang Malaysia Lumpar Ke-11 enggau siti projek KPLB udah tembu digaga lalu udah mujur mutarka isu bekal ai ba sekeda kandang menua di bagi menua tu,” ku JBALB Sarawak.
Kelimpah ari nya, ku iya, 15 projek iya nya 12 Projek Rayat, siti projek SCORE enggau dua projek SAWAS sepenyampau urung RM301 juta diatu agi dalam renggat ngaga lalu dipelabaka tembu ba ujung taun 2022.
Ku iya nambah, siti agi projek KPLB iya nya sepenyampau urung RM76 juta diatu benung dilangkar lalu diperambu deka dibuka tinda ba suku kedua 2022.
Beserimbai enggau nya, Menteri Muda Utiliti Sarawak (Bekal Ai)Datuk Dr Abdul Rahman Junaidi ti sama ngulu program ngelawa ke Projek Bekal Ai Bagi Menua Sarikei madah, projek ngaga ti benung sereta udah dipejalaika tu iya nya nyengkaum pengawa masang paip ti baru, pengawa ngaga tabngki ba palan ti tinggi, pengawa ngaga steseyn pam pengelaju ai, kerena ngangkatmanah palan meresi ai sereta pengawa muka palan endur ai mata.
“Pengawa ngaga tu mega mekuh ngagai kereja ngangkatmanah bekal ai ti endang udah bisi.
“Projek tu dipelabaka deka ngangkatka tikas sosioekonomi rayat di kandang menua tu lalu deka nyungkak pemansang ekonomi ti meruan agi.
“Empas ti positif tu deka nentuka kualiti idup ti manah agi ngagaiperanak di bagi menua Sarikei kelebih agi ngagai peranak di Julau, Pakan, enggau kandang menua KJD, Meradong, Bintangor, Tanjung Manis, Belawai nyentukka Pulau Bruit,” ku Abdul Rahman.
Nitih ku Abdul Rahman, pengawa ti dipejalaika perintah tu iya nya kena nentuka rayat bulih pun penatai ai ti bekualiti sereta meruan.
Ku iya nambah agi, projek tu iya nya sebagi ari Sistem Grid Bekal Ai Sarawak ti ari buah runding Kepala Menteri Datuk Patinggi Tan Sri Abang Johari Tun Opneg dalam mutarka isu bekal ai enggau efektif sereta mungkur semua.
Sama bisi datai maya program tu iya nya penyandang kerusi sitak Kunsil Nengeri (DUN) Repok Dato Sri Huang Tiong Sii, penyandang kerusi sitak DUN Meradong Datuk Ding Kuong Hiing enggau Residen Bagi Menua Sarikei Felicia Tan Ya Hua.