MIRI: Kena nentuka bekal ai di Sarawak manggai ba ikas bungkur 100 peratus manggai ba taun 2025, Perintah Sarawak nengah Opis Menteri Utiliti (MOU) udah ngaga perambu silik, kelimpah nyendiaka agih belanja besai kena ngemujurka nya.
Menteri Utiliti Sarawak Datuk Seri Dr Stephen Rundi Utom madah, Opis Menteri nya udah ngungkupka RM8.28 bilion kena ngaga 606 projek pemansang bekal ai di serata nengeri tu ungkup timpuh 2017 nyentuk 2021.
Ku iya, pengawa ngaga projek nya ngena dua strategi iya nya Sistem Grid Bekal Ai enggau Program Bekal Ai Alternatif Sarawak (SAWAS).
“Ke diatu,231 iti projek udah tembu digaga, 227 iti agi mengkang digaga lalu148 iti projek agi benung dalam fasa merambu. Projek bekal ai diperambu enggau silik sereta begunaka ungkus belanja ti amat besai, kelimpah kena nentuka visyen MOU ulih nyapai 100 peratus bungkur bekal ai, ulih dipejalaika manggai ba taun 2025,” ku iya madah ngagai Bernama.
Ku iya, bungkur ai beresi ke diatu di serata Sarawak iya nya 83.4 peratus ti mungkur 99 peratus kandang menua di mengeri lalu 66.5 peratus di menua pesisir.
Ku Dr Rundi, diatu indu pelin Sistem Grid Bekal Ai udah digaga nitihka zon lalu Zon Selatan ari baruh kuasa Lembaga Air Kuching (KWB), Zon Tengah ari baruh kuasa Lembaga Air Sibu lalu Zon Utara ari baruh pegai Lembaga Air Kawasan Utara (LAKU).
“Kami merambu ngempung semua ejensi nye nyadi siti entiti...reti nya semua ejensi mekal ai di Sarawak deka engkah ari baruh siti kuasa iya nya Opis Bekuasa Ai Sarawak (Sarawak Water Authority), ti deka meri empas berambu nya mungkur semua,” ku iya.
Ku iya, pekara ti beguna amat ba pengawa merambu grid tu iya nya mungkur empat komponen besai, berengkah ari jalai pemansut ai,loji meresi,chara nganjung enggau prospek penguna nya empu.
“Di Zon Selatan,ambika chunto,kitai bisi jalai pemansut ai ari Tekad Ai Bengoh ti ngemansutka dua juta liter sehari ti udah diberesi ba Loji Batu Kitang, nangkanka nya dianjung ngagai tangki ai tinggi lalu ai nya dipam air nyentuk ke Sebuyau (urung 110 kilometer ari Kuching),” ku iya.
Berebak enggau nya, SAWAS iya nya inisiatif Perintah Sarawak, nengah Opis Bekal Ai Menua Pesisir (JBALB) kena nyendiaka bekal ai ngagai genturung pendiau ti jauh enggau kandang menua ulu entigis ti apin bisi ai beresi ti selamat dikena.
SAWAS ngena teknologi 'osmosis berbalik' dikena meresi ai ari sungai ke besemak kena mekalka ai beresi ngagai peranak ke diau ngelingi nya.
Ku Dr Rundi, laban beratika pemansang bekal ai nengah sistem grid begunaka timpuh betaun - taun nembuka pengawa ngaga nya, program SAWAS dipejalai kena nyendiaka perengkaguna ari sukut ai beresi ti engkeman kena operasyen sereta mudah diintu peranak ba genturung pendiau ke jauh.
Nyentuk ke diatu, perintah nengeri udah mekalka 56,044 unit tangki ai ke beungkus lebih RM76 juta.
“Ungkup kandang menua Sebauh di Bintulu aja, bisi 10 buah rumah panjai (Rh) ti mungkur 339 pintu udah bisi bekal ai nengah SAWAS. Antara nya Rh. Banta, Rh. Unchau, Rh. Alip Long Unan, Rh. Irai Anak Gaseng, Rh. Enteri Anak Andeng enggau Rh. Ampie Anak Egang ngena ungkus urung RM42 juta,” ku iya.-- BERNAMA