SIBU: Seraka besai bida tauka nadai penyemaka dalam polisi perintah nyadi peransang ngagai Dr Low Chong Nguang, 50, enggau ba politik.
Chalun ke bisi potensial ari Parti Sarawak Bersatu (PSB) ungkup kerusi Kunsil Nengeri (DUN) Pelawan madah, rayat udah nganti kaban politik ngemanahka pekara tu, tang lalu nadai kala dikemanah taja pan udah besilih perintah.
“Nya kebuah aku ngaga pemutus bediri minta pi lih lalu nguji mai ubah nya, enti ulih, enda nganti orang bukai ngubah kitai.
"PSB meri platform seperti baka ti ditegika aku,lalu ketegal nya mih aku nyemilik PSB,” ku iya lebuh dirandau kemari.
Ku Dr Low, Sarawak enggau kelebih agi Sibu, udah jauh tinggal ari sukut pemansang enti dibandingka enggau nengeri bukai di Malaysia.
“Nadai penyemaka majak balat dipeda ninting hari. Asaika baka kitai tu jauh amat tinggal kelebih agi lebuh pandemik nyadi (COVID-19)," ku iya.
Pengemeran pengawa berubat nya madah, iya ulih ngaga mayuh agi ari nyadi siku orang politik ngagai rakyat enggau raban bansa bukai.
“Aku tau duduk dalam zon nyamai di klinik tang aku tetap milih dalam politik kena ngerembaika kaul sereta ngenyemakka diri enggau rayat.
“Tambah mega aku siku ari terabai menua, aku ngji naka ulih nyadung penemu perubataku ngagai mensia mayuh bekaul isu pengerai, kelebih agi bekaul igi penyakit enggau vaksin. Aku mega deka nyadung sekeda perengka ke diguna ngagai orang ti begunaka nya," ku iya.
Ku Low, iya enda irau ati taja pan betapi enggau sekeda chalun ari parti politik bukai.
“Nyadi orang baru dalam politik, aku nadai mayuh peneleba lebuh manstka buah runding ngagai semua orang. Aku semina nemu deka negika hak rayat lalu umbas mih enggau pennadai penyemaka ti udah diungkupka ngagai kitai kenyau ari kitai diada.”
Bekaul enggau prosedur operasyen standard (SOP) kimpin ketegal COVID-19, Dr Low madahka nadai pilih bukai kelimpah ari bepanggai ba media rama.
"Nyadi orang baru, aku begunaka semua akses kena ngelakuka aku ngagai mensia mayuh ti bepelasarka pekara ditegika parti," ku iya.
Ku Dr Low,iya ngarapka ulih nentuka semua orang dienah enggau sama rata, lalu merit akademik seseiku nentukarejista universiti perintah, ukai bansa.