LAWAS: Kerajaan Sarawak majak matau nyengkaum ari langit enggau tanah kena nagang pengawa berimba kampung enda beradat di nengeri tu.
Sapit Kepala Menteri Datuk Amar Awang Tengah Ali Hasan madah, pengawa nya majak sereta deka dikemayuhka agi dipejalaika begulai enggau ejensi penerit adat enggau Opis Kampung Sarawak.
Ku iya,aktiviti nagang penyalah ngerusak rampa menua tu mungkur mayuh raban bukai, lalu ukai semina dilempaika ba Opis Kampung aja.
"Patut amat mensia mayuh meri kerejasama ngagai perintah nengeri nengah chara meri pemadah ambika kami tau bejalaika pengawa nagang nya enggau jampat. Kami meri jamin, kami enda mantaika indentiti pemeri pemadah nya.
"Pengawa berimba kampung enda beradat tu ukai semina ngerugika perintah, tang ngaga mayuh pengerusak nyengkaum ngeruga rampa menua enggau kampung kitai ti kaya enggau bemacham flora enggau fauna.
"Enti pengawa berimba kampung enda beradat tu majak nyadi, tu deka ngeruga pengawa kami nyaga,ngintu sereta ngemanahka kampung ungkup timpuh panjai di nengeri tu," ku iya madah ngagai media pengudah ngelancharka program 'Le Tour De Restoration'(Greening Sarawak Campaign) renggat Bahagi Menua Limbang di Lawas bedau lama udah.
Sama bisi datai maya nya, Direktor Opis Kampung Sarawak Datu Hamden Mohammad, bala ketuai opis enggau ejensi sereta ketuai raban bansa di Lawas.
Ku iya, Tour De Restoration, Greening Sarawak's Campaign iya nya kimpin Opis Kampung Sarawak kena nambahka penyereta rayat ba pemesai reti ngintu rampa menua enggau kampung, setipak enggau 'Program Penghijauan Malaysia' ba renggat Perintah Besai.
Nengah program nya, Awang Tengah ke mega Menteri Pemansang Mengeri enggau Rampa Menua kedua madah,Heart of Borneo (HoB) deka nyadi palan mansik kampung ungkup serata Sarawak, kelimpah ngemansangka sebagi ari kandang endur nya nyadi 'Urban Forest Park'.
"Kandang endur tu ukai semina nyadi palan mansik bala tebangkar menua tu enggau antarabansa, tang mega deka nyadi palan matak penatai temuai meda pemanah rampa menua sereta flora enggau fauna ditu.
"Nengah pengawa ke baka tu, Sarawak arapa amat ulih nyapai 1 juta hektar kandang menua digazet nyadi Palan Dijaga Penuh (TPA) di nengeri tu nyerumba taun 2025," ku iya.
Nengah kimpin tu ku iya, Nengeri Sarawak ngembuan juluk deka nanam 35 juta pun kayu dalam timpuh Atur Pemansang Malaysia Lumpar Ke12 (RMK-12) tauka 7 juta pun kayu setaun berengkah ari taun tu nyentuk taun 2025.
“Nengeri Sarawak nadai penanggul nyapai penyampau kayu ke ditanam nya laban taun tu nyentuk ke sehari tu (13 November) udah nanam 6.98 juta pun kayu,”ku iya.
Ku iya baru, Perintah Nengeri udah ngungkupka belan ja ti besai kena ngemujurka agenda tu, kelebih agi dalam RMK-12, iya nya urung RM62 Juta. Taun itu, RM10 juta udah diagihka ungkup perengkaguna Opis Kampung merambu sereta bejalaika program restorasyen.
"Aku ngarapka pengerami ti diintu tu ukai semina naka di Lawas aja tang dipajakkka nengah pengawa ngemujurka aktiviti nanam pun kayu.Kompeni peribit enggau mensia mayuh di menua tu mega diperandang ngaga ‘enrichment planting’ ba kandang endur betanam betupi, tanah NCR denggau ke bukai," ku iya.