Anda di sini

DAM ngatur Pekit Ngajat Online, penyereta ulih dianjung berengkah 12-26 September

Advertisement
 

KUCHING: Orang mayuh ti beumur 13 taun ke atas diperansang masuk Pekit Ngajat Online 2021 ti diatur Gerempung Dayak Miri (DAM), lalu pengawa nganjung penyereta dibuka berengkah 12 September ngagai 26 September 2021 (pukul 12 tengah hari).

DAM ba sebengkah penerang madah pekit tu diatur ngena chara solo tauka siku-siku sereta dibagi ngagai Kategori Lelaki (30 pemekit) enggau Kategori Indu (30 pemekit).

Orang ke kala menang ba pengawa pekit ngajat ti diatur gerempung tu sebedau tu enggau pengajar betanda (guru Tari) enda dikemendar enggau bepekit.

"Video pemekit ke udah tembu sereta digaga ngena format MP4 patut dianjung sebedau 26 September 2021 ngagai email [email protected].

"Entara atur pekit tu, pemekit enda tau enda ngena ngepan asal Iban. Lalu maya ngerikod video ngajat tu patut diambi apus tubuh

"Semina tabuh ke udah dirikod ngena Audio Player aja tau dikena. Muzik Sape enda dikemendarka," ku DAM.

Siku pemekit semina dikemendar nganjung siti video sereta pengelama ajat enda lebih ari 5 minit.

Sebedau ngajat, pemekit patut madah ke nama diri enggau pejukul (nyema bisi), menua asal enggau nama ajat.

"Pemutus akim enggau nama pemenang deka dipadah kena 10 Oktober 2021.

"Pemenang lumur satu deka nerima perais mata duit RM1,000 enggau setipikit, lumur dua (RM700 enggau setipikit) enggau lumur tiga perais mata duait RM500 enggau setipikit," ku DAM.

Pemekit lumur empat ngagai 10 deka nerima saguhati mata duit RM200 enggau setipikit sereta pemekit ke bukai diberi setipikit pekit.

Penerang silik bekaul enggau Pekit Ngajat DAM Online 2021 tau ditanya tauka betelefon ngagai Opis DAM ba lumur 085-435467 (Kitty Janggot), Jacqueline Selaka (016-8786205) enggau Betty Pan ba lumur 010-9831231.
 

Advertisement