Anda di sini

Anang kelalu teguran macha ripot ninting hari kes COVID-19 ti majak nambah: Chambai

Advertisement
Chambai

SIBU: Raban bansa Dayak dilalau anang irau sereta teguran meda ripot ninting hari kes COVID-19 di nengeri tu.

Chairman Gerempung Bansa Dayak Sarawak (SDNU) Pampang Sibu Chambai Lindong madah, taja pan penyampau les nambah, ambika chunto baka di Sibu nya enda ngasuh irau laban pesakit nya dikategorika dalam ikas 1 enggau 2 aja.

"Bedau lama udah, aku bisi berandau enggau siku lutur bebansa Iban ti landik ba pengerai mensia mayuh. Kami duai berandauka pasal penanggul pengelekai COVID-19 di Sarawak kelebih agi di Sibu.

"Iya madah anang irau ati meda pekara tu (kes COVID-19 nambah) laban nya baka ke dijangka ketegal mayuh sektor ekonomi udah dibuka.

"Kitai ba palan pengelekai penyakit lalu ba timpuh ke sama  mega mayuh peranak Sibu udah divaksin ke alai program vaksinasyen kitai ke sebedau tu udah dipejalaika enggau jampat ti ngujungka risiko rampit nya kelalu balat tau ngenusahka," ku iya m adah nengah penerang berita ditu.

Ku Chambai, enda ulih majak nagang pemindah enggau nutup ekonomi laban nya deka nating rayat ti balat kena empas  pengawa bejalaika nya. 

Nya alai ku iya, suah ngelalau rayat ngambika seruran nitihka  prosedur operasyen standard (SOP) enggau idup ba norma baru.

"Kes ti dirikodka tebal agi dalam Kategori 1 enggau 2, tu  mandangka vaksin ke udah dituchuk ba kitai nya semitan laban antibodi kitai ulih ngelaban virus tu ari ti meri empas ke jai agi. 

"Reti nya pandemik tu  engka deka abis tang diganti enggau endemik, reti nya kitai deka idup begulai enggau COVID-19," ku iya.

Ku iya baru, raban bansa Dayak patut udah nyendiaka diri idup dalam endemik COVID-19 lalu timpuh nya engka deka dipadahka ujung bulan baru.

"Enti udah datai ba maya endemik,kitai deka idup begulai enggau COVID-19 tang chara pengidup kitai deka berubah lalu semampai ngemeranka SOP, idup dalam norma baru sereta mesti bejejaga.  

"Enti ilap, kitai dekan dirampit. Pengidup kitai mesti dipajakka sereta patut belajar idup begulai enggau COVID-19 seraya nyaga disiplin diri," tambah nya.
 

Advertisement