Anda di sini

PCDS 2030 dilancharka kemari

Advertisement
Abang Johari nerima bup PCDS 2030 ti disuaka Jaul seraya diperatika Awang Tengah, Uggah enggau Masing ba pengerami bejadi PCDS 2030, kemari. 

KUCHING: Empat objektif besai, tujuh batang strategi enggau enam sektor ekonomi dikemeran sereta dikemeratka dalam Strategi Pemansang 2030 Pengudah COVID-19 (PCDS 2030) kena nyapai juluk nyadi nengeri maju enggau bepenatai pemisi tinggi lebuh manggai ba taun 2030.

Kepala Menteri Datuk Patinggi Abang Johari Tun Openg madah, PCDS 2030 kena nyungkak enggau ngenegapka penumbuh sosio-ekonomi enggau pemansang ungkup timpuh 10 taun ke deka datai.

"Fasa keterubah PCDS 2030 deka dipejalaika ari baruh Langgur Pemansang Malaysia Ke-12 (RMK12), 2021 -2025. Tagit ari baruh RMK12 enggau PCDS 2021 nyentuk 2023 iya nya ekonomi ngerembai enggau pukul rata 6.0 ngagai 8.0 peratus setaun.

"Perintah Sarawak nganggarka RM63 bilion kena bejalaika PCDS 2030 ari baruh RMK12 lalu ari nya, RM30 bilion datai ari  belanja pemansang terus enggau RM33 bilion ari belanja alternatif,” ku iya lebuh bejaku bejadi Strategi Pemansang 2030 PengudahCOVID-19 ditu, kemari.

Ku iya nengah model Pekara Wang kreatif enggau asil diasilka baru tu, kitai deka ulih terus ngasaika penuduk fiskal ke manah.

Bejaku baru, iya madah setipak enggau batang strategi CDS 2030, 'public capital spending' deka dipejalaika ba kandang endur ti meri empas ekonomi, sosial enggau endur pendiau ti pemadu mayuh.

"Fokus kitai deka ngemansangka baka infrastruktur baka jalai enggau jematan, bekal ai beresi enggau kuasa elekterik sereta bungkur telekomunikasyen.

"Tu deka meri pelasar ngagai kitai nginsit ngagai fasa kedua pemansang PCDS 2030, ti dibai orang ti bisi penau enggau pemandai, pengelandik enggau inovasyen.

"Perambu tu chukup mai pengelantang ngagai nengeri, rayat enggau nyaga endur pendiau ungkup pemansang ti tegap," ku iya.

Taja pia ku Abang Johari, perintah enda ulih ngereja kediri enti nadai sukung enggau komitmen ari semua rayat Sarawak nyengkau ketuai dagang ke deka ngasilka barang enggau servis ngena chara lebih jampat pulai manah baru sereta tegap, apai indai ti deka ke pekara ti manah ungkup anak sida sereta semua rayat bisi tanggungpengawa.

"Aku optimis enggau Pelin tu sereta aku arap bendar komitmen kita pelan tu ulih nyadi nyata. 

"Aku ulih besemaya enggau kita ngena pengarap ke diberi ngagai perintah GPS, deka mayuh agi pemansang ulih diasaika rayat. Nya alai, aram kitai bekerejasama ke pemanah Sarawak jemah ila," ku iya.

Kelimpah ari nya, ba aum pengarang berita PCDS 2030 Abang Johari ditanya sekalika iya arap endar dalam timpuh lapan taun ke deka datai, nengeri tu ulih nyingkang sereta nyapai PCDS 2030, iya madahka Sarawak ulih nyapai nya.

"Aku arap bendar. Aku arap bendar laban orang kitai ngembuan penau enggau pengelandik.

"Empat taun ke udah aku meda pengelemi kitai ba senentang infratruktur nyengkaum bekal kuasa elekterik, ai enggau jalai alun, lalu dua taun ke udah kitai berengkah (nyendiaka semua nya) sereta diatu kitai ulih bejalaika iya.

"Maya nya suba aku melaba kitai enda ulih ngereja tang diatu kitai ulih nyapai iya, diatu projek tu benung dipejalaika. Penyambung fizikal baka jalai alun enggau jematan deka ulih disedia sereta deka dipajakka, reti nya lebuh manggai ba taun 2024 tauka 2025 tu udah tembu, nyengkaum infrastruktur digital, kami melabaka tembu lebuh manggai ba taun 2025 tauka 2026," ku iya.

Bisi datai ba pengerami nya kemari Sapit Kepala Menteri Datuk Amar Douglas Uggah Embas, Tan Sri Datuk Amar James Jemut Masing enggau Datuk Amar Awang Tengah Ali Hasan, Sekretari Perintah Nengeri Datuk Amar Jaul Samion sereta bala menteri enggau menteri muda ke bukai.
 

Advertisement