BINTULU: Peranak rumah panjai ti diau tauka bekereja di pasar tu dilalau anang pulai ke rumah panjai enti nadai kebuah berat diatu kena ngurangka pengelekai COVID-19, pia ku Kaban Parlimen Bintulu, Datuk Seri Tiong King Sing.
Ku iya, taja pan diatu Bintulu udah nyingkang ngagai fasa kedua Pelin Mulaika Pemanah Menua (PPN) ke alai nyauka semua sektor ekonomi berengkah dibuka, nya ukai reti perang ngelaban COVID-19 udah abis.
“Ke pemadu manah, tetiap individu patut majak nitihka Prosedur Operasyen Standard (SOP) ti ditetapka kena nagang pengelekai COVID-19 nengah chara nyaga seraka fizikal nyengkaum ngena sengkabung idung enggau mulut ba palan ti ditapatka mensia mayuh,” ku iya nengah siti penerang, kemari.
Ku iya, penurun penyampau kes ke brampit ninting hari di Bintulu ukai reti komuniti ditu nadai agi dirampit COVID-19 laban nya tau niki baru enti mensia mayuh enda ibuh ke SOP.
Berebak enggau nya, Tiong madahka diri asa ati enggau sekeda premis nyual pemakai di bagi menua nya laban enda ngemeratka SOP ba premis sida lebuh iya ke matau premis di Pasar
Bintulu.
Ku iya, tetiap iku pengempu tauka pekereja premis abis nadai udah betuchuk siti dos vaksin COVID-19 ngambika sida bisi imuniti ba virus ke tau munuh nya.
“Tetiap pengempu premis nyual pemakai patut ngemeranka SOP ti terit kena nentuka tetiap iku orang ke datai makai ba premis sida meresa tikas pengangat tubuh sereta ngerimbaska aplikasyen MySejahtera, lalu ungkup ti nadai aplikasyen nya, sida mesti nulis nama enggau lumur telefon dalam bup rikod ti disediaka,” ku iya nyemetak.
Tiong mega madahka diri irau ati laban mayuh orang ti enda ngemeratka pekara ngasika SOP ke alai nya meri pemar ngagai opis bekuasa nagang pengelekai penyakit nya.
Nya alai, tetiap iku mensia mayuh patut ngembuan tanggungpengawa ngagai diri empu, diri sebilik enggau orang bukai ke ngelingi kelebih agi ba nembiak mit ke baruh ari umur 12 taun, nyengkaum raban orang ke bedau betuchuk vaksin, laban raban nya berisiko tinggi tau kena rampit virus nya.