Anda di sini

Program betuchuk vaksin bansa Penan di Limbang dichakahka agi

Advertisement
 

LIMBANG: Beratika semina 18 iku raban bansa Penan di kandang menua ulu Limbang ti besetuju deka betuchuk vaksin naka kediatu, program pemereti ati betuchuk vaksin di kandang menua nya deka dichakahka nengah program ‘outreach’ ari 25 nyentuk 27 Julai tu.

Menteri Muda Betanam Betupi Moden, Tanah Adat enggau Pemansang Kandang Menua Sarawak Datuk Dr Abdul Rahman Ismail madah, bisi 387 iku raban bansa Penan di kandang menua ulu Limbang.

“Kitai chukup irau ati sentang program vaksinasyen ungkup raban bansa Penan laban enda mayuh ti besetuju deka dituchuk vaksin. Berindik ari nya, kitai deka bejalaika mayuh agi program meri penerang bekaul pemereti ati enggau pemerat vaksin ba raban bansa Penan di ulu Limbang,” ku iya maya aum media pengudah Aum Program Imunisasi COVID-19 Menua Pelilih Menua Limbang di Bilik Aum Batu Lawi, Opis Residen Bagi Menua Limbang.

Sama bisi iya nya Kaban Kunsil Nengeri (ADUN) Batu Danau Paulus Palu Gumbang, Residen Bagi Menua Limbang Ir Ahmad Denney Ahmad Fauzi, Pemesai Perubat Bagi Menua Dr Norliza Jusoh enggau Direktor Sepital Limbang Dr Mohd Faez Ibrahim.

ADUN Bukit Kota nya mega nerangka program ‘outreach’ tu enggau tuju kena madahka pemaik program imunisasi ngagai raban bansa Penan.

“Opis Pengerejista Bansa (JPN) deka dikangau maya program tu laban agi mayuh peranak Penan ti bedau ngulihka tingki lalu meransang sida datai betuchuk vaksin bansa Sinovac dos keterubah,” ku iya.

Maya program ti sama, ku iya, sekeda pemesai ari Unit Pemansang Nengeri ti bansa Penan deka dikangau sama ngambika ulih meri penerang maya program ke deka disereta 13 ejensi perintah nya.

Dr Abdul Rahman madah, program betuchuk vaksin di Bagi Menua Limbang diatur enggau manah sereta nitihka timpuh ke ditetapka Opis Menteri Pengerai Malaysia (KKM) lalu mekuh deka nyapai 77 peratus peranak deka dituchuk vaksin di bagi menua tu sebedau 13 Ogos tu.

“Naka 16 Julai, bisi 52.4 peratus iku di Bagi Menua Limbang udah betuchuk dos kedua ti ngaul 38,714 peranak. Ari penyampau tu, nya ngaul 18,431 peranak di Pelilih Menua Limbang (45.2 peratus) enggau 20,283 peranak di Pelilih Menua Lawas (61.2 peratus),” ku iya nerang.

Ku iya nambah agi, Limbang mega ngemeranka chara madahka prosedur operasyen standard (SOP) tambah enggau ngaga peresa ‘swab’ ngagai sebarang orang ti tama ke pelilih menua tu kelebih agi ti ngena bilun.

Kelimpah ari nya, ku iya, Sarawak mega agi nagang pemindah entara pelilih menua kena nagang pengelekai COVID-19 kelebih agi varian Delta ke diatu udah bisi di Sarawak.

“Di Limbang kiai bisi SOP tambah enggau ngatur pengawa meresa ‘swab’ ngagai sebarang sida ti datai ke Limbang ngena bilun. Chara tu ulih mantu lalu nyema diperatika ngagai kes ti nyadi di Limbang, chara nagang kitai endang manah, lalu kitai deka neruska chara tu,” ku iya.

Advertisement