Anda di sini

Tembu betuchuk dua dos vaksin, tau tama ke Bintulu

Advertisement
Jack Aman
Jack Aman

BINTULU: Orang ke udah tembu betuchuk dua dos vaksin COVID-19 dalam timpuh dua bulan ke atas, tau enda ibuh beperesa swab COVID-19 sebedau tama ke bagi menua Bintulu.

Chairman Komiti Mutarka Penusah Ngenyit Bagi Menua (JPBB) Bintulu Jack Aman Luat madah, pemutus digaga dalam aum nya, setipak enggau nengeri tu ti nyingkang ngagai fasa kedua Pelin Mulaika Pemanah Menua (PPN).

"Taja pia,pemutus nya deka dipansik ujung bulan tu bepanggai ba gaya rampit COVID-19 di Bintulu," ku iya lebuh ke bejaku dalam aum media ditu, lemai ensana.

Samabisimayanya, Pemesai Pengerai Bagi Menua Bintulu Dr Melvin Chung enggau Kepala Polis Pelilih Bin Chairman Komiti Mutarka Penusah Ngenyit Bagi Menua (JPBB) Bintulu
tulu, Superintenden Zulkipli Suhaili.

Ku iya, pemutus tu mega deka meransang orang ke bedau ngerejista diri ngambika divaksin, ngerejista diri enggau lengkas ngambika divaksin enti sida deka ke Bintulu.

Ku iya, permit polis agi dikena ungkup pemindah entara pelilih menua laban pekara nya apin dikemendarka ari baruh fasa kedua PPN di Sarawak.

Ku iya, sesapa ke deka mindah pansut ari Bintulu tauka orang ke baru mansa tauka singgah di Bintulu, tau enda ibuh agi beperesa swab.

"Tang orang ke bedau divaksin ti deka ke Bintulu, mesti beperesa swab COVID19 lalu timpuh sah pemutus peresa nya 14 hari," ku iya.

Residen Bagi Menua Bintulu nya madah, orang ke gawa dalam servis ke beguna amat tau enda ibuh beperesa swab enti sida mindah ari siti pelilih menua ngagai pelilih menua bukai lain dalam Bagi Menua Bintulu, lalu semina siti aja dokumen ke diguna iya nya dokumen pengelala diri enggau surat ari pengaji sida.

Ku iya, komiti nya udah minta ngagai Komiti Mutarka Penusah Ngenyit Nengeri Sarawak (JPBNS) ngambika sektor ekonomi di Bintulu beoperasyen ari pukul 6 pagi nyentuk pukul 9 malam.

"Langgur penemu bukai iya nya bekaul enggau penyampau maksimum penumpang ti dikemendarka dalam perengka pengangkut ungkup sektor perintah enggau ekonomi ti semina tau ngundan tiga iku aja,enda nyengkaum deriba," ku iya.

Ku iya, ubah ba prosedur operasyen standard (SOP) ungkup Bintulu udah dikenataika ngagai JPBNS ngambika disah lalu digazet, tang SOP di bagi menua Bintulu agi nitihka SOP nengeri.

Taja pia ku iya, kami udah ngaga sekeda ubah kena ngemanahka SOP di bagi menua tu bepelasarka beberapa faktor.

"Kami enggau naka ulih mendingka penemu ari renggat ke baruh lalu beratika gaya orang ke dalam sektor ekonomi. Kami nguji ngaga penyemaka, tang mega bejejaga enggau varian baru COVID19 ti diripotka di Sarawak," ku iya.

Ku iya, komiti tu mega merambu meri pengelunggar ngagai tagang ba sekeda aktiviti ekonomi, tang bedau mantaika nya nyentuk ke JPBNS setuju.

"Nitihka gaya vaksinasyen di Bintulu kena 13 Julai ke mega penerang ti diasilka nengah chara automatik ari Covid-19 Immunisation Task Force (CITF), 201,442 iku di bagi menua nya ke beumur 18 taun ke atas tau divaksin," ku iya.

Ku iya, bisi 157,779 iku tauka 78,32 peratus ari orang ke tau udah betuchuk dos keterubah vaksin COVID19, lalu 67,124 tauka 33.32 peratus udah tembu betuchuk dos kedua.

Advertisement