KUCHING: Pusat Transit Penerimaan (PTP) Jil Puncak Borneo deka diangkat manah, kena nyeliahka insiden orang ke dijil dia ngerarika diri enda nyadi agi.
Direktor Jil Puncak Borneo, Hamdan Salleh Majim madah, kunteriktor ke patut udah dichiri bejalaika pengawa ngangkatmanah tikas pengelikun bai begunan PTPnya.
Ku iya, berindik ari insiden orang ke ditan dia ngerarika diri, sida udah meda pengelemi iya nya geraga besi ke dilekatka.
“Begunan tu kebendar iya udah diangkatmanah taun siti nyin tadi kena nagang pengelekai penyakit COVID-19 ba bilik besai jil nya.
“Nya alai pengatur pengawa ke pemadu tinggi meri langgur penemu ngambi numbuhka PTP ke alai kami udah diungkupka RM300,000 kena nngelekatka geraga besi ba sepiak dalam.
“Taja pia maya staf ti bejalaika pengawa matau jil, sida enda ulih meda tambah mega CCTV dilekatka ari luar,” ku iya maya ba aum media begulai enggau Sapit Kepala Polis Pelilih Padawan, DSP Lim Jaw Syhong ba Indu Opis Polis Pelilih Padawan, Siburan Hari Satu tu tadi.
Ku Hamdan, PTP sebedau tu endang begunan kuarters kelas F ti udah digazet sereta diangkat manah.
Ku iya ketegal penyakit COVID-19, orang ke ditan diengkah ba PTP ke nyadi palan kuarantin pengelama 14 hari, sebedau dibai ngagai bilik besai nitihka prosedur operasyen standard (SOP) sekumbang penyakit tu nyadi.
Tambah iya, pengudah pemutus swab test sida negatif, nya baru sida dianjung ke bilik besai jil nya.
“Pengudah insiden nya, aku udah ngemuangka PTP sereta nganjung semua orang ke ditan dia ngagai bilik besai jil seraya ngarapka nadai agi kes berampit COVID-19 nyadi.
“Kami udah nyiri kunteriktor ngambi nambahka agi pengelikun ba begunan tu sereta ngarapka nadai agi insiden (ngerarika diri) nya nyadi,” ku iya.
Di tanya bekaul enggau orang ke ditan dia ti ngerarika diri nengah pintu kedua jil, Hamdan madahka sida deka engkah raban sida bejaga 24 jam ba pintu kedua nya.
“Ke penemu rama, jil nya bisi dua pintu iya nya pintu besai enggau kedua, pintu kedua nya semina dikena maya bisi nyadi kes ngenyit, lalu kami deka engkah bala kami nyaga 24 jam ba pintu kedua tu ngambika ulih mantu ari sukut pengelikun,” ku iya.
Kena Hari Empat minggu nyin tadi, empat iku orang ke ditan dia udah ngerarika diri nengah penjan agu, ke alai sida udah ngerusakka geraga besi lalu ngerarika diri ke babas ke semak nya.
Maya insiden nya nyadi, maya nya ujan bangat enggau kabut.
Taja pia, dua iku ari sida nya mujur ditangkap baru raban pematau jil semula nya urung pukul 6.25 lemai enggau 10.50 malam ba kandang perumahan PR1MA di Kampung Sinar Baru.
Dua iku agi ti sama ngerarika diri mujur ditangkap baru kena ke hari kelima operasyen ngiga sida ba kandang perumahan Batu 11, Padawan, ensana.