LUNDU: Sapit Kepala Menteri Datuk Amar Douglas Uggah Embas madah, sukung penuh ke diberi perintah nengeri ngujungka Program Imuninasyen COVID-19 Menua (PICK) renggat nengeri udah mujur sereta jampat dipejalaika.
“Kitai ukai semina bepanggai ba ‘input’ perintah besai aja. Kepala Menteri kitai (Datuk Patinggi Abang Johari Tun Openg) udah mayuh meri sukung ari sukut belanja enggau chara.
“Ketegal nya mih, diatu kitai (Sarawak) entara nengeri pemadu atas di Malaysia ba penyampau rayat ke udah divaksin,” ku iya pengudah nemuai seraya kereja ngagai Palan Nuchuk Vaksin (PPV) di Dewan Suarah Lundu, kemari.
Uggah ke mega Chairman Komiti Mutarka Penusah Ngenyit Nengeri Sarawak (JPBNS) taja pia madahka pemujur Sarawak dalam program imunisasyen COVID-19 nya bepanggai ba stok vaksin ke diulih ari perintah besai.
“Enti Raban Pengereja Pengawa khas Imunisasyen COVID-19 (CITF) menua enda meri penyampau vaksin ke diguna,kitai enda ulih nyapai tagit nuchuk vaksin ba 2.2 juta iku peranak di nengeri tu manggai ba ujung bulan Ogos ila.
“Taja pia, CITF udah besemaya deka nganjung (penyampau vaksin) ti diguna kitai. Diatu kitai minta 430,000 dos seminggu,” ku iya.
Ku Uggah, naka 5 Julai 2021, 1,555,944 rayat Sarawak udah divaksin, ari penyampau nya 1,226,659 udah betuchuk dos keterubah lalu lalun nya udah tembu betuchuk dos kedua.
Ku iya, kena 5 Julai 2021 aja 56,068 iku udah divaksin.
“Diatu kitai deka nambahka penyampau tu ngelui ari 60,000 sehari ngambika ulih nyapai tagit kitai.
“Bisi 313 PPV udah ditumbuhka di serata nengeri, 68 nya PPV perintah, 84 klinik pengemeran pengawa berubata, 51 klinik perintah, 24 sepital besai, 35 palan nuchuk vaksin industri, 12 sepital peribi t, 36 palan (vaksinasyen) mobile, dua Palan (nuchuk) AstraZenneca enggau sebuah PPV universiti,” ku iya.
Kelimpah ari nya ku iya, Combat Medic Vaccination Team Angkatan Tentera Malaysia (CMVT ATM) mega mantu nuchuk vaksin ba peranak di Lawas, Miri enggau Kapit.
Nengah bantu sida tu, program vaksinasyen COVID-19 ulih dipejalaika jampat agi sereta mungkur semua.
Berebak enggau nya, Uggah mega meri terima kasih ngagai pengari rayat Gabungan Parti Sarawak (GPS) laban nyaup ngemujurka program vaksinasyen ba sitak sida iya enggau sekeda gerempung ukai dik uasa perintah (NGO) sereta gerempung korperat.
Iya mega gaga ati laban 23,584 iku peranak Lundu ti ngerejista diri ngambika divaksin, 17,951 (76 peratus) udah betuchuk dos keterubah lalu 8,248 (35 peratus) betuchuk dos kedua.
Dulu ari nya, Uggah enggau Penyanding PenemuJPBNS Dato Sri Dr Sim Kui Hian sereta Sapit Sekretari Perintah Nengeri Datu Ik Pahon Joyik diberi penerang bekaul enggau gaya program vaksinasyen COVID-19 di pelilih menua nya ri Pemesai Pelilih Lundu, Gustain Durani enggau Pemesai Pengerai Pelilih Lundu, Dr Nicky Orrellius Tennent.
Sama bisi maya nya, Kaban Kunsil Nengeri Tanjung Datu Datuk Amar Jamilah Anu enggau Residen Kuching, Sherrina Hussaini.