KUCHING: Pemujur penebah sape ke tebilang di menua tu, Alena Murang enggau Sarah Lois Dorai ba renggat dunya, meri inspirasyen ngagai bala nembiak di nengeri tu, ngambi nitihka singkang seduai kelebih agi dalam industri muzik, kreatif enggau ngeluarka filem.
Menteri Nembiak Lumba enggau Main, Datuk Abdul Karim Rahman Hamzah madahka seni kreatif, muzik enggau pengeluar filem engka nadai natak rebak baru mantaika pengelandik sida.
“Meri pengaga ati ngagai Alena enggau petungal iya Sarah. Pemujur seduai amat ngemegahka kitai sereta ngengkahka Sarawak enggau Malaysia dalam arena muzik antarabansa ti balat amat besemekih.
“Taja pia, seduai udah mandangka artis Sarawak ngembuan pengelandik dalam muzik enggau filem kreatif ti nyadi pelasar mandangka pengaya budaya sereta pesaka Sarawak enggau Borneo,” ku iya nengah penerang berita kemari.
Abdul Karim ke mega Menteri Dagang Temuai, Seni enggau Main Asal Sarawak madah tradisyen, budaya, seni enggau sejarah Sarawak seruran ulih matak imiginasyen orang ari menua bukai ketegal ngembuan penteba ke isotik.
“Video muzik ti chukup manah diasilka enggau jalai cherita ti ngerinduka orang ke meda, ngasuh sida berundingka pemanah nengeri Sarawak kelebih agi bekaul enggau sejarah, budaya seni enggau tradisyen kelia.
“Nya agi nyadi palan ke manah ti nadai ba menua bukai,” ku iya.
Iya mega muji video muzik ti diasilka orang sama ti udah ngujungka Alena bulih anugerah nya ti diberi nama “Midang Midang” ti digaga Sarah begulai enggau Kanid Studio and Project Room.
Alena engau Sarah bulih anugerah Best Asia & Pacific Music Video sereta bulih gelar ‘kehormat’ dalam Kategori ‘Kostum Terbaik’ ba Anugerah Video Muzik Antarabansa (IMVA) taun ini di United Kingdom (UK).
Video muzik seduai di beri nama “Warrior Spirit” dikeluarka dalam YouTube kena 27 Mei lalu diatu mujur bulih 149,000 view di serata dunya, kelimpah matak pengerindu bala juri IMVA ari mayuh bengkah menua.