KUCHING: Parti Tindakan Demokratik (DAP) Sarawak nambahka agi penyampau slot program servis teksi enda bebayar ungkup peranak Kuching ke deka ngagai Palan Nuchuk Vaksin (PPV) ditu.
Chairman DAP Chong Chieng Jen madah, DAP udah ngaga pemutus nambahka 100 iti agi slot pejalai (pulai mansang) nepan teksi enda bebayar ti disediaka DAP.
Dulu ari tu ku iya, DAP udah ngelancarka servis perengka pengangkut enda bebayar nya nengah nyendiaka 100 slot pejalai ngagai mensia mayuh ti begunaka servis nya.
“Sehari tu penerima ngena servis ke-100 ti dilancharka sebedau tu ke udah ngambi dos kedua vaksin ngena servis teksi enda bebayar ti disediaka DAP.
“Ketegal agi bisi deka beguna enggau peminta ari mensia mayuh ke PPV, kami ngaga pemutus nambahka 100 iti agi slot pejalai (pulai mansang) ngagai mensia mayuh,” ku iya.
Iya madah munyi nya lebuh ke nyambut penatai penumpang tauka ke ngena servis teksi enda bebayar ke-100 ti udah dilancharka bulan nyin tadi, ditu kemari.
Ku Kaban Parlimen Stampin nya, ngarapka mensia mayuh ti begunaka servis nya anang enda ngena peluang nya laban ungkus nya dibayar DAP Sarawak.
“Kami meri terima kasih ngagai SerakupTeksi Bagi Menua Kuching laban udah bekerejasama enggau kami nyendiaka perengka pengangkut enda bebayar ngagai mensia mayuh ti nadai utai tepan ngagai PV.
“Ngena awak nya mega iya meransang mayuh agi orang betuchuk vaksin COVID-19 ngambika juluk vaksinasyen 80 peratus peranak Sarawak ulih dijapai,” ku iya.
Enggau nya ku Chong, semua sektor ekonomi enggau sosial tau dibuka sereta pulai manah baru kelimpah terus nitihka prosedur operasyen standard (SOP).