SIBU: Urung 14,000 iku udah mujur dituchuk vaksin COVID-19 ba Palan Nuchuk Vaksin Industri (PPVIN), di Universiti Kolej Teknologi Sarawak (UCTS) pengudah ke berengkah beoperasyen kenyau ari 28 Jun.
Chairman Opis Kaunsil Pelilih Sibu (MPS) Clarence Ting madah, penyampau nya mujur dijapai dalam kandang tujuh hari lalu vaksinasyen dos kedua dipelabaka kena 19 Julai ila.
“PPVIN tu ditumbuhka dalam timpuh ke pandak, tang penyakah Kumpulan Pansar ari baruh embing Pemancha Datuk Jason Tai, semua dipejalai enggau lanchar sereta mujur.
“Aku mega meri terima kasih ngagai UCTS laban udah ngemendarka kampus sida nyadi PPVIN alai nuchuk vaksin ngagai orang dalam sektor industri,” ku iya lebuh ke dirandau pengarang berita pengudah ngabas proses vaksinasyen di UCTS, lemai ensana.
Ku iya baru, renggat kedua vaksinasyen mungkur urung 3,687 iku, deka berengkah pagila.
Iya mega ngarapka kes COVID-19 majak kurang, seraya madahka Sibu ensana bisi ngerikodka 32 kes baru.
Berebak engagu nya, Mandal Canselor UCTS Profesor Datuk Dr Khairuddin Abdul Hamid berasai gaga ati laban PPVIN nya nerima sambut ke manah ari industri ngelingi Sibu.
“Kompeni mega amat responsif sereta meri sukung penuh sereta nganjung pekereja sida ngambika divaksin.
“Ungkup operasyen nya, semua lanchar magang ditu,” ku iya.
Ku Khairuddin, pukul rata lebih 2,000 iku divaksin ninting hari sereta ngarapka mayuh agi deka divaksin di Sibu enggau Sarawak.
“Ketegal nya mih kitai meda Sibu enggau Sarawak ba atas ari sukut penyampau individu ke divaksin.
“Kami ngarapka ulih meda penyampau kes positif COVID-19 nurun ngenyit,” ku iya.
Ke rikod, PPVIN enda kena nangkup pinta pekereja industri.
PPV ditumbuhka nengah kerejasama Pansar Berhad, UCTS enggau Segi University Sibu Clinical Campus.