SRI AMAN: Kaban Kunsil Nengeri (ADUN) Lingga Simoi Peri udah ngelimpangka awak ngabas Palan Betuchuk Vaksin ba Tengah Laman Opis Pelilih Menua Mit Lingga ditu, pagi kilah ensana.
Nitih ku Simoi, bisi 216 iku ti betuchuk vaksin kemari lalu program tu deka diteruska nyentuk 7 Julai tu enggau penyampau semua bisi 1,065 iku.
Ku iya, semua penerima vaksin tu iya nya peranak di kandang menua Seduku enggau Lingga.
“Nama ti dipeda aku, proses betuchuk vaksin ngagai sida ti bekaul tu udah dipejalaika enggau manah,” ku iya lebuh ti ditemu pengudah datai ngabas PPV di Lingga pagi tadi.
Beserimbai enggau nya, iya mega udah nyuaka pemeri pemakai lalu bisi mega meri 50 kutak ai irup ungkup raban terabai menua ti bejalaika pengawa di PPV nya sereta ngagai penerima vaksin.
Beserimbai enggau tu, Simoi mega ngena awak tu meri besai terima kasih ngagai Opis Menteri Pengerai, perintah Sarawak ari baruh Gabungan Parti Sarawak (GPS), Komiti Mutarka Penusah Ngenyit Nengeri sereta Bagi Menua enggau raban terabai menua sereta mensia mayuh ba komitmen ti tinggi bekaul Program Betuchuk Vaksin tu.
“Meri besai pengaga ati ngagai Kepala Menteri kitai laban udah ngena chara tu ngemeratka guna rayat ti udah meri peluang ngagai rayat kitai betuchuk vaksin dulu pengudah nya baru ngerejista,” ku iya nerang enggau silik.