Anda di sini

Sarawak ulih nyapai 80% imuniti nyema KL meri vaksin ti udah disemaya

Advertisement
 

KUCHING: “Sarawak deka nyapai 80 peratus penegap imuniti ngagai COVID-19 datai ba bulan Ogos enggau penetap Kuala Lumpur (KL) meri kitai vaksin ti udah disemaya sida,” ku Sapit Kepala Menteri Tan Sri Datuk Amar James Masing (gambar).

Nitih ku iya dalam siti penerang, kebuah pia ba Sarawk tu ukai ketegal duit, laban nengeri tu ngembuan belanja kena meli vaksin ti diguna.

“Ti nyadi tanda tanya ditu, sekalika KL deka ngemendarka kitai bulih tauka meli vaksin ke diguna nengeri Sarawak?

“Aku ngarapka politik enda nyadi kebuah dalam pekara tu, laban kitai ngaga semua tu kena nyaga pengelikun rayat Sarawak ari igi penyakit COVID-19 ti ulih nabanka nyawa,” ku Masing ti sama disempulang bini iya Puan Sri Datuk Corrine Masing lebuh ti ngelawa ke Bakun ensana.

Iya ti mega Kaban Kunsil Nengeri (ADUN) Baleh sebedau tu udah ngatur program betemu enggau raban terabai menua vaksinasyen COVID-19 ti betuaika Dr Peter Ronald Bihos.

Raban tu baru aja nembuka operasyen nuchuk vaksin COVID-19 ngagai orang ti diau di ulu Tekat Bakun iya nya sebagi ari Program Vaksinasyen ‘Outreach’ Perintah.

Urung 80 iku udah dituchuk vaksin dalam timpuh dua hari sebedau tu.

“Taja palan tu endang jauh lalu udah bejalaika program tu dalam dua hari, raban terabai menua tu dipeda agi ransing,” ku iya nambah.

Advertisement