Anda di sini

Rayat nengeri tu dipelaba tembu dua dos vaksin ba minggu kedua bulan Ogos

Advertisement
 Dr Mohamed Sapian enggau Dr Sim lebuh ti ditemu raban media. — Gambar Roystein Emmor
ANANG IRAU: Dr Mohamed Sapian enggau Dr Sim lebuh ti ditemu raban media. — Gambar Roystein Emmor

KUCHING: Rayat nengeri tu dipelabaka deka chukup dua dos tuchuk vaksin COVID-19 kena minggu kedua bulan Ogos ti deka datai, pia ku Direktor Opis Pengerai Nengeri Sarawak (JKNS) Datuk Dr Mohamed Sapian Mohamed.

Iya madah, juluk kitai tu ulih dijapai berindik ari bisi raban deka nambahka penyampau betuchuk vaksin ngagai 60,000 nyentuk ke 65,000 dos sehari.

Naka diatu, ku iya, Sarawak udah nyapai 1.5 juta dos vaksin dituchuk ngagai rayat nengeri tu.

“Kebuah pia, bisi mayuh Palan Betuchuk Vaksin (PPV) dibuka di selampur nengeri sekalika di klinik pengerai perintah, klinik peribit, industri enggau mayuh agi.

“Urung 285 PPV dibuka di Sarawak diatu lalu penyampau tu enda nyengkaum enggau raban vaksinasyen mindah kin kitu (tim mobile),” ku iya lebuh ti ditemu maya ngabas ke PPV Klinik Pengerai Tanah Putih ti bepalan ba Sekula Primari Bansa China (SJK) Pending ditu, kemari.

Sama bisi ngelawa PPV tu iya nya Menteri Kandang Menua enggau Pengawa Berumah Dato Sri Dr Sim Kui Hian.

Dr Mohamed Sapian nambah, nitihka penyampau ti pemadu baru diatu, Sarawak udah nyapai 10 peratus nuchuk vaksin ungkup raban orang besai tuai.

“Kitai agi neruska ativiti nuchuk vaksin COVID-19 lalu berindik ari nya, kitai deka beterima kasih ngagai perintah besai ke alai bekal vaksin kitai diatu udah manah sereta bisi ngembuan stok ti chukup ti deka diberi ngagai selampur rayat Sarawak.

“Terima kasih mega ngagau perintah Sarawak, Komiti Mtarka Penusah Ngenyit Nengeri (JPBNS), pengari rayat, raban volunteer nyengkaum lutur, misi sereta derisa ti udah pinchin ke meri bantu ba PPV,” ku iya.

Enggau bantu tu, ku iya nambah, tu ngelempungka tating penusah raban pengereja pengawa Opis Menteri Pengeri Malaysia (KKM) kelebih agi dalam dua pekara iya nya nguranga kes COVID-19 lalu pia mega nuchuk vaksin ngagai mensia mayuh.

“Kitai nemu Sarawak agi ngerikodka kes COVID-19 urung 300 ke 500 kes sehari tang penyampau tu udah ngayanka bisi penurun.

“Nengah kerejasama ari semua raban, aku pechaya kes COVID-19 di nengeri tu ulih dikurangka. Semina nama ti dikearapka kitai ngambika peranak Sarawak agi ngemeranka prosedur operasyen standard (SOP) taja udah betuchuk vaksin,” ku iya.

Iya pechaya peranak di Sarawak chukup ngemerat sereta bisi tanggungpengawa dalam ngemeranka garis laalu kena nagang pengelekai igi penyakit tu.

Advertisement