MIRI: Kibauka tambai burak lebuh ti endang amai begunaka bantu, ukai semina nguji nasit, nya lalau Kaban Kunsil Nengeri (ADUN) Telang Usan Dennis Ngau.
Ku iya madah, kimpin ngibauka tambai tu kena madahka ngagai orang bukai ngambika meri bantu enggau lengkas tu endang chara ti engkeman tang tu begunaka pengelurus ati mensia mayuh.
“Aku meretika enggau gaya nengeri tu ti besaisereta gaya geografi ti mayuh penguji ngujungka sekeda peranak bedau nerima bantu ari perintah.
“Taja pia aku ngarapka nadai raban ti beambi ulih enggau pemenah sereta ulah ti siru bala bakih kitai ke endang deka besaup orang bukai ti betapi enggau penusah,” ku iya lebuh ti nyebut bekaul inisiatif tambai burak ti benung nyadi trend ba media rama kenyau berapa hari tu udah.
Nengah kimpin tu, peranak ti putus bekal pemakai ulih ngibauka tambai burak ba rumah sida empu.
“Naka diatu aku bedau nerima penerang bekaul peranak di Telang Usan ti ngibauka tambai burak.
“Kebuah pia, aku ti nyadi pengari rayat terus bekomunikasyen enggau ketuai genturung pendiau, kunsilor, ketuai komuniti enggau palan servis ngambika meda guna rayat,” ku Dennis nyemetak.
Ku iya madah, mayuh ti nerima telefon ukai semina minta bantu pemakai tang mega sentang pekara pengelantang pendiau ke bukai.
Ku iya, nyadi pengari rayat Gabungan Parti Sarawak (GPS), mayuh raban deka ngaga ti pemadu manah kena mantu peranak di kandang menua Telang Usan.
Ku iya, siti ari nisiatif perintah sebedau tu iya nya Program Baku Pemakai ungkup peranak di menua pesisir di Baram.