BINTULU: Penanggul lenyau batang pengawa, nadai chukup duit belanja kena meli tusu anak sereta teputus bekal barang pemakai pemun entara ti ditapi empat ruang bilik ke udah ngibauka tambai burak ba mua palan pengentap pendiau sida di genturung pendiau Kdurong kena lemai kilah ensana.
Taja pia Skuad Sahabat Prihatin ti nganjung bantu di sekeda palan nya betul tepansaka empat buah rumah tu lalu lengkas nasat sereta betatika penanggul ti ditapi lalu enda masau jam nyuaka bantu ke diguna sida.
Tukang wang raban tu ti nyadi ketuai nganjung bantu tu, Mohd Akbar Sawkat Ali madahka, raban sida tu engkeman benung nganjung bantu di genturung pendiau nya lalu tepedaka sekeda rumah bisi ngibauka tambai burak.
“Kitai terus nasat lalu meresa sida ti mayuh udah betapi enggau penanggul bekaul pengawa, nadai belanja kena bebelika tusu anak lalu putus bekal pemakai pemun.
“Berindik ari nya, raban kami lengkas nganjung bantu ngagai ruang bilik tu,” ku iya lebuh ti ditelefon ditu kemari.
Naka ke diatu, kitai semina udah tetemuka empat buah rumah aja ditu ti bisi ngibauka tambai putih ke udah tekeruga penatai pemisi sida.
Ku iya nerang, entara bantu ti dianjung ngagai ruang bilik tu iya nya tusu nembiak mit, berau, telu, gula, teh enggau mi, ti nyadi barang pemun ti diguna.
Inisiatif kimpin #KempenBenderaPutih di palan pengentap pendiau diatu nyadi trend di media rama, ti minta mensia mayuh ke benung betapi enggau penusah dipinta ngibauka tambai burak kena madah ngagai mensia mayuh iya nya sida begunaka bantu.
Naka diatu kimpin tu udah nerima timbal ti chukup manah lalu mega dikemeratka mensia mayuh.
Penanggul ditapi sekeda peranak tu iya nya ketegal kena empas enggau pengelekai igi penyakit COVID-19 nyentukka udah ngeruga batang pengawa sereta penatai pemisi sida.
Beserimbai enggau nya, Mohd Akbar madah, Skuad Sahabat Prihatin tu ditumbuhka maya taun 2015 ke udah disereta sekeda raban ti megai tanggungpengawa mantu komuniti ke begunaka nya di bagi menua tu.
“Skuad tu mega disereta raban nembiak kena nerenakka penemu ngagai sida bekaul enggau kereja tanggungpengawa rama korporat (CSR),” ku iya.