Anda di sini

Program Vaksinasyen ‘Mobile Outreach’ ngelengkaska proses nuchuk vaksin COVID-19

Advertisement
 Abang Johari (dua kanan) ngabas Program Vaksinasyen Mobile Outreach di Balai Mayuh Guna Datuk Daud Abd Rahman, Kampung Matang, Batu 10, Jalai Matang, Kuching kemari. Sama bisi dipeda Fadillah (kanan), Uggah (tengah) enggau Dr Sim (dua kiba). — Gambar Chimon Upon
NGELAWA: Abang Johari (dua kanan) ngabas Program Vaksinasyen Mobile Outreach di Balai Mayuh Guna Datuk Daud Abd Rahman, Kampung Matang, Batu 10, Jalai Matang, Kuching kemari. Sama bisi dipeda Fadillah (kanan), Uggah (tengah) enggau Dr Sim (dua kiba). — Gambar Chimon Upon

KUCHING: Program Vaksinasyen ‘Mobile Outreach’ mujur ngelengkaska proses betuchuk vaksin COVID-19 di nengeri tu.

Kepala Menteri Datuk Patinggi Abang Johari Tun Openg madahka, naka 2 Julai, 1,488,895 dos tuchuk vaksin COVID-19 udah diberi ngagai peranak di Sarawak.

Ari penyampau tu, ku iya, 1,227,579 iya nya penerima dos keterubah lalu 261,280 individu agi udah nerima dos kedua.

“Aku meda chara kitai tu udah ngenataika asil ti mujur kena kitai nyapai juluk 80 peratus rayat Sarawak betuchuk vaksin datai ba ujung bulan Ogos tu.

“Aku meri besai terima kasih ngagai semua rayat Sarawak ti udah nyambut sereta betuchuk vaksin laban baka ti ditemu kitai tu kena ngelaban COVID-19 iya nya nengah vaksinasyen,” ku iya.

Iya madah munyi nya ba aum media pengudah ngelawa Program Vaksinasyen Mobile Outreach ba Balai Mayuh Guna Datuk Daud Abd Rahman, Kampung Matang, Batu 10, Jalai Matang ditu kemari.

Ku Abang Johari nambah, ba bagi menua Kuching aja nyengkaum Bau enggau Lundu, bisi 304,507 individu tauka 52.25 peratus udah nerima tuchuk dos keterubah.

Lalu 62,367 tauka 11 peratus individu agi di bagi menua Kuching udah nerima tuchuk dos kedua.

Nengah program vaksinasyen tu, Abang Johari madahka tu iya nya kerejasama entara raban opis pengerai, Kaban Kunsil Nengeri (ADUN) sitak ti bekaul nyengkaum raban peribit.

Program tu ku iya kena nuchuk vaksin ngagai raban di kandang menua pesisir mengeri ti enda pansut ke palan betuchuk vaksin (PPV) di palan bukai.

Ungkup individu ti raya sakit, ku iya, bisi sebuah agi tim ti mindah ari rumah ke rumah diberi tanggungpengawa nuchuk vaksin.

Beserimbai enggau tu urung 1,000 individu ti deka dituchuk ungkup program tu iya nya ari peranak Kampung Matang Batu 10 enggau kandang menua ti besemak.

Sama bisi, Sapit Kepala Menteri Datuk Amar Douglas Uggah Embas, Menteri Kanan Kereja Raya Datuk Seri Fadillah Yusof, Menteri Kandang Menua enggau Pengawa Berumah Dato Sri Dr Sim Kui Hian, ADUN Tupong Fazzruddin Abdul Rahman enggau Senator Dr Zaiedi Suhaili.

Advertisement