Anda di sini

Lima sektor di Miri sedia muka servis PPV Industri

Advertisement

MIRI: Lima sektor industri ditu udah besedia deka muka Palan Betuchuk Vaksin (PPV) Industri pengudah dikemendar Pengereja Pengawa Khas Imunisasi (CITF).

Menteri ti Megai Tanggungpengawa Komiti Mutarka Penusah Ngenyit Bagi Menua (JPBB) Miri Datuk Lee Kim Shin madah, lima PPV Industri ti udah dikemendar tu iya nya Emart Riam, Miri Port, Oil and Gas Lutong, Saremas enggau SOP Lambir.

“Naka diatu, lima sektor industri udah dikemendar lalu sebuah agi agi nganti.

“Pengeransing sektor industri tu berindik ari aum nengah Zoom dua kali bedau lama ti udah lalu meri penerang bekaul pengawa ngatur PPV Industri di mengeri besai Miri,” ku Lee nerang nengah siti penerang kemari.

Raban CITF ku iya, mega udah begulai enggau lima PPV Industri ti dikemendarka nya minta sida ngatur pengawa nyikap diri ti diguna lalu dipelabaka deka bejalaika operasyen kena tengah minggu ti deka datai.

Ku Lee, nengah pengawa muka PPV Industri nya, tu deka terus ulih ngelengkaska program vaksinasyen di Miri.

“Pia mega, enggau pemisi PPV Industri tu deka ngemuntangka agi sida ti bekereja ba sektor ti bekaul ngambika ulih betuchuk vaksin ti dampih ari palan endur gawa.

“Kelimpah ari nya, tu deka ngemuntangka pengaji nentuka pekereja sida udah betuchuk vaksin,” ku iya.

Ungkup sektor ba palan bebelika barang, ku Lee nerang, tu mega deka ngemuntangka penyuwa premis sida betuchuk vaksin.

“Ambika chunto PPV Industri Emart Riam ti besedia nyendiaka servis nya,” ku iya.

Ku iya nambah, Miri bisi empat kategori PPV iya nya PPV Mensia Mayuh, PPV Sepital Peribit, PPV Perubat Mensia Mayuh enggau PPV Industri ungkup program vaksinasyen ti dipejalaika.

“Bisi mega perambu deka numbuhka PPV Mobile ti ulih meri peluang ngagai sida ti sakit enggau orang lunggar umur ulih betuchuk vaksin,” ku iya nandu.

Advertisement