KUCHING: Opis Pengerai Nengeri Sarawak (JKNS) ngesahka empat kluster baru ditemu di nengeri tu, iya nya di Kuching, Tebedu enggau Bintulu.
Kluster di Kuching iya nya Kluster Jalai Haji Taha, siti ari kluster endur gawa bekaul enggau sebuah kompeni sekuriti bepalan di Jalan Haji Taha.
“Urung 294 iku pengereja pengawa dia udah diperesa COVID-19, alai 121 kes ditemu positif nyengkaum kes indeks; 143 kes negative enggau 30 kes agi nganti pemutus makmal.
“Ke semua kes positif udah nya dipasuk ngagai Sepital Umum Sarawak (HUS) enggau PKRC ditu,” ku Komiti Mutarka Penusah Nenyit (JPBNS).
Nangkanka nya, Kluster Pagar Tebedu di sitak Tebedu bekaul enggau kluster ke ditemu nyadi ba orang ke kena tan (Orang Kena Tahan tauka OKT) di Lokap Tahanan ba palan Polis Tebedu, Serian.
“Urung 29 iku ari sida tu diperesa COVID-19 lalu semua sida nya ditemu positif nyengkaum kes indeks. Semua kes positif udah nya dipasuk ngagai PKRC di Serian,” ku JPBNS.
Kluster 35 Bintulu siti ari kluster endur gawa bekait enggau sebuah pelantar minyak ke mega udah kena pentin Atur Nagang Pemindah Diteritka Agi (PKPD) ba zon tasik maritim Bintulu.
“Urung 83 iku pengereja pengawa dia diperesa pengerai, lalu 15 kes ditemu positif COVID-19 nyengkaum kes indeks; enggau 68 kes agi nganti pemutus makmal. Semua kes positif udah nya dipasuk ngagai Sepital Miri enggau PKRC di Miri,” ku JPBNS.
Enam kes positif COVID-19 ke bisi ditemu di Depo Tahanan Imigresyen Semuja di Serian udah ngujungka Kluster Semuja ditukuka baru.
Opis Pengerai Nengeri Sarawak (JKNS) nengah Komiti Mutarka Penusah Ngenyit Menua Sarawak (JPBNS) madahka, kluster tu kedua kali iya udah nyadi, pengudah kluster keterubah disahka abis timpuh kena 8 Mei tu tadi.
Maya timpuh nya (kes/kluster keterubah), urung 441 kes positif COVID-19 ditemu di palan nya.
“Abis timpuh kluster kena 8 Mei bedau lama tu tadi, pengudah nadai kes baru diripot ari pemun kes tu, timpuh kluster nya diketuka.
“Tang, kena 1 Julai tu tadi, COVID-19 ngerekai baru ba kluster nya, alai enam iku orang ke kena tan di Kem Semuja nya ditemu positif ngujungka kluster tu dibuka baru,” ku JPBNS.
Kluster Semuja di Serian tu siti kluster bekaul enggau palan ngetanka orang ti salah Opis Imigresyen Malaysia (JIMS) di Depo Tahanan Imigresyen Semuja di Serian.
“Tu kedua kali iya kluster tu nyadi...Nya berengkah ari enam kes positif COVID-19 ba entara sida ke kena tan (Orang Kena Tahan tauka OKT) ari menua Pakistan, ke diperesa pengerai sida iya ba palan pengerai pribet, alai perambu udah nya deka nganjung sida iya pulai ngagai menua asal sida, enti nitih kena 1 Julai tu tadi.
“Taja pia, ba pemun peresa nya orang ke kena tan tu tadi ditemu positif lalu ngerampit OKT bukai, lalu ngujungka penambah kes positif ngagai 59 kes,” ku JPBNS.
JPBNS nandu baru madahka mayuh ari OKT di Kem Semuja nya datai ari Indonesia, lalu ditangkan enggau orang Bangladesh, India enggau Myanmar.
“Semua sida tu udah nembuka timpuh jil sida iya di Rumah Jil di Sri Aman enggau Jil Besai Sibu.
“Sida OKT tu udah dua kali diperesa COVID-19 ari jil endur sida iya (sebedau di anjung ngagai Kem Semuja) lalu pemutus peresa nya sigi negative.
“Sida tu di anjung ngagai Kem Semuja ari jil endur sida iya laban deka di anjung pulai ngagai menua asal sida,” ku JPBNS.
Naka kediatu, ke semua OKT nya diatu di kuarantin ba blok isolasi kem nya, lalu ditangkan enggau dua kali agi peresa COVID-19 sereta di kuarantin 14 hari sebedau sida iya di pasuk ngagai blok tahanan utama.
“Urung 75 OKT udah diperesa COVID-19, alai 71 ari sida tu ditemu positif COVID-19, sereta empat sida bukai negative ba pemun peresa.
“Diatu OKT ke positif nya udah dipasuk ngagai PKRC Depo Tahanan Imgresen (DI) Semuja. Kelimpah ari nya, tasat ke silik agi deka digaga sereta ngiga kaul sida iya bukai ke kala semak enggau sida iya, ke benung digaga diatu,” ku JPBNS.
Kelimpah ari nya, JKNS mega ngesahka bisi lima buah kluster udah abis timpuh pengudah nadai kes baru diripot dalam kandang 28 hari tu.
Kluster nya, Kluster Tanjung Kibong di Sibu; Jalan Jambusan di Bau; Lubok Nitih di Saratok; Sungai Sian di Meradong enggau Jalan Pinang Riam di Miri.
“Kluster ke agi aktif agi bisi 96 kluster, alai 11 ari nya bisi ngerikod 33 penambah kes baru, lalu 85 ke bukai nadai ngerikod penambah kes,” ku JPBNS.