Anda di sini

Geran MRP patut diagihka enggau lengkas, ku Sikie

Advertisement
 Sikie (kiba) nyuaka chek ngagai penerima.
KENA MEMANAH: Sikie (kiba) nyuaka chek ngagai penerima.

TATAU: Agih belanja projek mit menua pesisir (MRP) patut diagihka enggau lengkas maya gaya di nengeri tu agi betapi enggau COVID-19 kena nyeliahka nya abis timpuh lalu tu deka nanggul maya deka nusun baru pengawa ngagihka nya.

Menteri Muda ba Opis Kepala Menteri (Undang-Undang enggau Adat Bumiputera) ti mega Kaban Kunsil Nengeri (ADUN) Kakus, Datuk John Sikie Tayai madah, taja pan pia pengawa ngagihka bantu tu diberi bererenggat nitihka kandang menua enggau maya enggau ngasika prosedur operasyen standard (SOP).

Ku iya, pengawa ngagihka geran tu bepanggai ngagai Komiti Pemansang enggau Pengelikun Genturung Pendiau (JKKK) kena melanjaka agih bantu nya sekalika ungkup projek pemansang rumah panjai sida tauka enggau pekara bukai.

“Tuai rumah mega patut madahka ngagai nembiak redak sida bekaul enggau chek ti diterima ngambika sida nemu bekaul pekara nya,” ku iya lebuh ti nyuaka chek MRP ngagai 65 JKKK enggau gerempung di sitak Kakus enggau penyampau semua nya RM1,382,000 di Rumah (Rh) Jan Jelian, Ulu Sungai Tau, Anap Tatau kemari.

Ba kandang menua Nanga Tau, chek diagihka ngagai empat JKKK Rh Gansa, Rh Satan, Rh Jan enggau Rh Dilang semua nya RM65,000 lalu di Rh Ukit ba sitak Muput ngaul 12 JKKK.

Pengudah nya pengawa ngagihka bantu tu deka diatur ba sitak Bawan, Kakus, Sungai Arip enggau Opis Pelilih Menua Tatau nyentuk 5 Julai tu.

Dalam program nya, TR Jan mega udah madahka peminta deka ngangkatmanah jalai simpang ke rumah panjai sida penyauh 2.1 kilometer (km).

Pia mega Sikie ngelalau peranak ngambika terus ngasika semua SOP entara nya ngena sengkabung idung enggau mulut taja pan bisi ti udah betuchuk vaksin COVID-19.

Iya mega minta semua peranak terus nyaga ruang bilik enggau kaban belayan sida ti beumur 17 taun ke baruh ti bedau betuchuk vaksin kena nentuka terus bejejaga.

Penghulu Micheal Agul ti bisi datai dalam program ke sama mega sama minta peranak di rumah panjai ti tau ngambika datai betuchuk vaksin ungkup pengelikun komuniti semua lalu enda tepejuh enggau berita ti enda betul ke bekaul enggau vaksin.

Advertisement