KUCHING: Perintah Sarawak udah ngemansutka belanja RM1.5 juta kena meli asil betanam betupi dikena mantu raban orang bumai bekebun, ti napi penanggul kelalu mayuh asil ari pengawa betanam betupi.
Sapit Kepala Menteri, Datuk Amar Douglas Uggah Embas madahka isu asil ari pengawa betanam betupi nya ukai semina nyadi maya Atur Nagang Pemindah (PKP) ke diatu, tang ari keterubah PKP dipejalaika taun siti nyin tadi.
“Nya alai, opis menteri aku (Opis Menteri Betanam Betupi Moden, Tanah Adat enggau Pemansang Kan dang Menua tauka MANRED) udah meri agih belanja ngagai Gerempung Peladang enggau Opis Dagang Betanam Betupi Perintah Besai (FAMA) Sarawak, kena meli asil betanam betupi nya ngambika dijual tauka diberi nyadi bantu,” ku iya.
Iya madah munyi nya lebuh ke dirandau pengarang berita penudah nyuaka bantu Opis Menteri Betanam Betupi enggau Industri Pemakai Malaysia (MAFI) Prihatin, ngagai pengereja pengawa terabai menua ba Palan Nuchuk Vaksin (PPV) Stadium Perpaduan ditu kemari.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, perintah nengah opis menteri iya deka majak mantu raban orang bumai bekebun.
Kelimpah ari orang ke bumai bekebu ku iya, bantu ke sebaka mega diberi ngagai Opis Pemansang Ikan Malaysia (LKIM) kena mantu orang berikan ti napi penanggul ke sebaka.
Ke beguna amat ku Uggah, nentuka asil betanam betupi enggau asil orang ke berikan ulih dijual ngambika sida ulih neruska pengidup.
Bekaul enggau bantu ba PPV, nya asil kerejasama entara MAFI, MANRED, FAMA Sarawak enggau Gerempung Peladang Kawasan (PNK) Kuching, Samarahan enggau Siburan.
Antara bansa buah ke diberi iya nya semangka black lady, nenas moris, pisang otel enggau longan kristal.
Bantu nya mega kelai pengaga ati enggau sukung ngagai raban pengereja pengawa terabai menua di PPV nya, kelimpah ngelakuka buah enggau sayur nengeri tu ngagai raban ke ditagit.
Berebak enggau nya, Uggah mega bisi nerima bantu ai irup dalam butul ari Datuk Bandar Kuching Selatan, Dato Wee Hong Seng ungkup raban pengereja pengawa terabai menua di PPV nya.
Sama bisi maya nya, Direktor FAMA Sarawak Abdul Ja’afar Lian enggau Direktor Opis Betanam Betupi Sarawak, Dr Alvin Chai.