MIRI: Perintah nengeri benung ngelengkaska program vaksinasyen COVID-19 dalam juluk bulih imuniti beraban ke mesti dijapai kena 31 Ogos ti deka datai.
Menteri Perengka Pengangkut Datuk Lee Kim Shin madah, dalam nyapai juluk nya, pemerat nuchuk vaksin tu iya nya ungkup raban terabai menua sereta sida ti bekaul dalam servis ti patut nyengkaum sektor perengka pengangkut ungkup sektor nganjung pemakai enggau ai irup.
“Endang beguna kena nentuka raban terabai menua tu ulih tuchuk vaksin laban sida ti betemu enggau mensia mayuh ninting hari,” ku iya dalam siti penerang kemari.
Berindik ari nya, Lee nerang, bisi 12,162 rintai nama ejensi servis beranjung enggau perengka pengangkut mensia mayuh udah digumpul Opis Menteri Perengka Pengangkut Sarawak lalu disuaka ngagai Opis Residen enggau Opis Pengerai ungkup tuju betuchuk vaksin.
Rintai tu iya nya ngaul 1,576 ejensi servis beranjung nyengkaum deriba lori, 645 deriba bas, pengajar sekula deriba (800), deriba e-hailing (4,677), deriba teksi (1,147), 982 parcel hailing (p-hailing) ti ngaul raban ti nganjung pemakai, sida ti mai perengka pengangkut sungai (617) enggau 1,718 staf penerebai bilun.
“Bepelasarka timbal ari bala deriba lori, aku dipadahka naka diatu bisi 1,397 udah betuchuk vaksin lalu rintai nama ke diterima iya nya 89 peratus nama deriba lori ke diberi ari Sarawak Forwarding Agency Association.
“Tu nyengkaum 101 deriba lori ari 151 deriba ari Miri ti bekaul enggau pengawa mai barang ke menua Brunei Darussalam sereta mega ke Limbang enggau Lawas ti nengah Brunei,” ku iya.
Pia mga ku Lee nyemetak, bedau lama ti udah raban penerit adat menua Brunei mega udah sama meri penetap mesti betuchuk vaksin nyema deka tama ke manua sida ungkup sida ti mai perengka pengangkut ari menua luar.
Penetap tu mega berengkah diteritka kena 13 Julai tu.
“Berengkah sehari tu (kemari) di Palan Betuchuk Vaksin (PPV) Institut Pengelandik Nembiak Menua (IKBN) Miri, sekeda raban ti nganjung pemakai p-hailing mega udah betuchuk vaksin dos keterubah sida.
“Beserimbai enggau nya, bisi 169 raban ti ngnjung pemakai p-hailing di bagi menua Miri udah nganjung nama sida ngambika ulih betuchuk vaksin,” ku Lee nambah.
Berindik ari nya, iya ngansa sida ti bedau ngerejista ngambika betuchuk vaksin sereta meri kerejasama enggau ngaga peminta nengah Opis Residen di bagi menua diri empu ngambika ulih ngerejista nama enggau lengkas kena ngemujurka juluk bulih imuniti beraban.