KUCHING: Raban orang timpang pendiau (OKU) ti bedau betuchuk vaksin COVID-19 dipinta ngambika madah kediri ngagai Opis Menteri Pengintu Pengelantang, Pengelantang Komuniti, Orang Indu, Ruang Bilik enggau Pemansang Nembiak Mit (KKKWKPK) kena nyeliahka sida tinggal ari program tu.
Menteri KKKWKPK Dato Sri Fatimah Abdullah madah, naka 30 Jun, penyampau OKU ti udah betuchuk di Palan Betuchuk Vaksin (PPV) Palan Konvensyen Borneo Kuching (BCCK) iya nya bisi 1,424 iku.
Lalu ari baruh Program Vaksinasyen OKU ba Palan Berubat Pakar Normah berengkah 18 Jun nyin tadi, penyampau OKU ti udah dituchuk vaksin iya nya bisi 444 iku.
“Ungkup di PPV ke dibuka ba Palan Transformasyen Mengeri (UTC) Kuching tu, bisi dirikodka iya nya 87 iku OKU ti benggal betuchuk vaksin sehari tu (kemari) lalu 33 iku OKU agi deka datai kena Hari Satu,” ku iya lebuh ti ngelawa PPV nya kemari.
Ku Fatimah nambah, juluk opis menteri nya deka nyapai lebih 80 peratus OKU di nengeri tu kena tuchuk vaksin nyengkaum bala atlet para Lumba enggau Main Malaysia (SUKMA) Sarawak.
Berindik ari nya, ku iya, ungkup OKU ti enda berejista ari baruh sebarang gerempung, sida dipinta ngambika madah ngagai opis menteri kena ngengkah sida dalam lis ba sebarang PPV.
Bekaul vaksinasyen ungkup raban pengajar enggau orang ti gawa ba Palan Nyeridi Nembiak Mit (TADIKA enggau TASKA) sereta pemantu, opis menteri madahka sida 100 peratus deka betuchuk vaksin.
Ku iya, tu kena nentuka semua raban pengajar, penyaga enggau pemantu sereta apai indai ti nganjung anak ke TADIKA enggau TASKA likun.
Naka 1 Julai ku iya, 84 peratus tauka 6,021 iku pengajar enggau penyaga TADIKA sereta TASKA nyengkaum pemantu mega udah kena tuchuk vaksin.
Bekaul pengawa ngambi pekereja OKU dalam sektor perintah enggau peribit, Fatimah madahka semua tu ti mekuh ngagai 1 peratus OKU diambi bekereja dalam sektor perintah bedau ulih dijapai.
Taja pia ungkup opis menteri iya, juluk nya udah dijapai, ku iya nambah, mayuh OKU ti enda ulih meda (buta) udah bekereja kediri empu nyadi tukang ngurut.