KUCHING: Nadai kes COVID-19 dirampit varian Delta B.1.617.2 diripotka di Sarawak naka ke diatu, pia ku Chairman Komiti Mutarka Penusah Ngenyit Nengeri Sarawak (JPBNS), Datuk Amar Douglas Uggah Embas.
Uggah ke mega Sapit Kepala Menteri madah, varian Delta nya pemadu tau ngasuh tusah, lalu ketegal nya JPBNS netapka prosedur operasyen standard (SOP) ti amat terit ngagai orang ari Wilayah Persekutuan Labuan enggau Semenanjung Malaysia ti deka tama ke nengeri tu.
“Sebedau tu, rayat Sarawak ti pulai ari Semenanjung Malaysia tau enda ibuh beperesa swab, tiga hari sebedau bekejang ke Sarawak.
“Diatu kitai neritka baru chara penama ke Sarawak ke alai sida ari Semenanjung Malaysia enda tau enda beperesa swab tiga hari sebedau bekejang,” ku iya.
Iya madah munyi lebuh ke dirandau pengudah nyuaka bantu ‘MAFI Prihatin’ ngagai pengereja pengawa terabai menua, ba Palan Nuchuk Vaksin (PPV) Stadium Perpaduan ditu, kemari.
Tambah Uggah, kena nagang pengelekai varian Delta di Sarawak, JPBNS mega nagang penama individu ti bisi sejarah kala di Labuan dalam kandang 21 hari ke Sarawak.
Orang ke deka tama ke Sarawak ari Labuan ku iya, mesti minta pemendar ari JPBNS.
“Kami ngeletakka penetap ti terit agi kena nagang varian Delta tu tama ke Sarawak.
“Varian tu pemadu tau ngasuh tusah lalu kitai besampi ke varian nya nadai di Sarawak,” ku iya.
Nitihka Gerempung Pengerai Dunya (WHO) kena 22 Jun 2021, bisi 85 buah menua mantaika ripot madahka bisi kes COVID-19 varian Delta.
Nitihka penerang Opis Menteri Pengerai Malaysia (KKM), Malaysia bisi ngeripotka kes rampit COVID-19 varian Delta di Wilayah Persekutuan Kuala Lumpur, Wilayah Persekutuan Putrajaya, Labuan, Johor, Negeri Sembilan enggau Perlis.
Varian Delta keterubah endar ditemu di India sereta tau jampat berampit enggau ngelekai, ngujungka gaya pengerai jampat nyadi raya lalu meri risiko jampat agi dipasuk ke sepital.