Anda di sini

Siti kluster COVID-19 baru nyadi ketegal nyengai pemati: JKNS

Advertisement

KUCHING: Pengawa nyengai pemati di Kampung Siol Kandis di Petra Jaya ditu, nyadi kluster ke baru COVID-19 kemari, ku Opis Pengerai Nengeri Sarawak (JKNS).  

JKNS madah pengawa nyengai pemati ke nyadi kluster ba Lorong 3, Kampung Siol Kandis nya berengkah ari ngintu pemati enggau sembiang ke diatur entara 2 ngagai 4 Jun, lalu ditangkan enggau 12 Jun, ngujungka sida ke bisi datai ngagai pengawa nyengai pemati nya kena rampit COVID-19.

“Tu siti ari kluster komuniti ke ditemu bekaul enggau sekeda ruang bilik di Lorong 3, Kampung Siol Kandis, ditu. Pengelekai penyakit tu nyadi nengah pengawa nyengai pemati ke bisi diintu komuniti di kandang menua nya, sereta pengawa besembiang ke orang mati enggau maya ke pendam.

“Urung 123 mensia mayuh ke diau di genturung pendiau nya diperesa pengerai, lalu 45 kes ditemu positif COVID-19 nyengkaum kes indeks; sereta 78 kes negatif.

“Semua sida ke positif udah nya dipasuk ngagai Sepital Besai Sarawak (HUS) enggau palan kuarantin PKRC ditu,” ku JKNS.

JKNS mega ngesahka bisi siti kluster udah nembuka kuarantin iya nya Kluster Jalai Haji Lampam di Miri, laban nadai kes baru bisi nambah dalam kandang 28 hari nya.

Naka kediatu, bisi 95 kluster ke agi aktif, lalu ari penyampau nya, 16 kluster aktif bisi ngerikod 125 penambah kes baru, lalu 79 kluster nadai sebarang penambah kes.

Ba pekara ke sama Komiti Mutarka Penusah Ngenyit Nengeri Sarawak (JPBNS) mutuska tiga buah genturung pendiau di nengeri tu kena pentin Atur Nagang Pemindah Diteritka Agi (PKPD) di Tatau, Meradong enggau Serian.

JPBNS madah genturung pendiau ke kena PKPD, iya nya Rh. Was anak Jenteng, Sungai Entajum, Tatau (berengkah ari ensanus 30 Jun ngagai 13 Julai tu), Rh. Nyandang, Sungai Rayah, Jalan KJD, Bintangor di Meradong (kemari 1 Julai ngagai 17 Julai) enggau Kampung Mongkos di Serian (2 ngagai 15 Julai).

Kelimpah ari nya, genturung pendiau ke udah sereta deka nembuka PKPD bisi tujuh genturung pendiau di pelilih menua Sri Aman, Bintulu, Betong, Sibu enggau Kanowit.

Genturung pendiau ke udah nembuka PKPD kena 30 Jun tu tadi iya nya di Rh. Kilon, Sebu Ulu, Tanjung Bijat, di Sri Aman; Enam genturung pendiau enggau endur gawa di Bintulu, iya nya Kuarters Pekerja Chicwan Batu 5; Kuarters 15, Ladang Sebubu, Samalaju; Kuarters Pekerja Ladang Almabumi Plantation Sdn Bhd, Ladang Bukit, Ulu Sebauh; Rh. Buli anak Amit, Sungai Semanok, Tatau; Rh. Salang anak Unsa, Sg. Separai, Tatau; enggau Rh. Slyvester Bunsu anak Ganyun, Ng. Selilai Kakus, Tatau.

Kelimpah ari nya, PKPD udah abis timpuh lalu nadai agi dipejalaika mungkur Rh. Dana, Nanga Tebalau, Betong (kemari 1 Julai); Rh. Grace Itun, Sungai Salim di Sibu (seharitu 2 Julai); Rh. Pinggan, Sungai Salim di Sibu (seharitu 2 Julai); Rh. Empauk anak Manggi, Pulau Dudong di Sibu (seharitu 2 Julai) enggau Rh. Kubu, Nanga Tada di Kanowit (seharitu 2 Julai).

  • oleh
  • Advertisement