BINTULU: Sektor ekonomi di nengeri tu deka dibuka beratika gaya ini trend kes enggau atur bejalaika program vaksinasyen ke jampat kena nyapai ‘imuniti kelompok’ ti nagit nuchuk vaksin abis nadai 85 peratus peranak menua tu manggai ba ujung bukan Ogos tu.
Menteri Utiliti ke mega menteri mangku tanggungpengawa dalam Komiti Mutarka Penusah Ngenyit Bagi Menua (JPBB) Bintulu, Dato Sri Dr Stephen Rundi Utom madah, sida nemu pemar ke ditapi kita komuniti dagang enggau ke bukai, nya alai majak jampat program vaksinasyen nya dipejalaika ngambika trend kes nurun, jampat agi mega kita muka sektor ekonomi di nengeri tu.
Taja pia ku iya, ba gaya ke diatu kitai agi beratika situasyen nya sereta deka muka sekeda sektor ekonomi ke patut perlu aja kelebih agi sektor ke beguna amat enggau kritikal, kena nentuka kitai ulih ngelengkaka diri ari pemar ke ditapi.
“Di Sarawak trend kes nya enda meruan lalu kitai agi napi gaya kes ke nambah enggau nurun, tang pekra tu agi ulih dijaga kitai,” Ku iya lebuh ke dirandau media maya ke ngabas Palan Nuchuk Vaksin (PPV) Industri ungkup sektor minyak enggau gis ti mungkur Petronas enggau kunteriktor sida iya ba Kelab Kidurong Bintulu
kemari.
Nya alai ku iya, kitai enggau naka ulih sereta begunaka sukung ari semua kelebih agi ari mensia mayuh, mantu pengereja pengawa terabai menua perubat, raban polis enggau ke bukai nagang pengelekai penyakit tu.
“Nyema kita tetemuka jalai alun ke dedat laban perengka pengangkut, mansa empang jalai enggau ke bukai, mesti deka ‘swab test’ sebedau tama ke Bintulu, kami nadai chara bukai laban semua prosedur operasyen standard (SOP) nye mesti diteritka laban penyampau kes kitai tinggi,” ku iya.
Ku iya baru, Bintulu, Kuching, Miri, Sibu nyauka ninting hari (kes nambah enggau nurun) lalu diatu kitai beratika kes nya majak mula nurun, tang ingat perang kitai bedau tembu.
“Kitai agi chakah ngelaban (penyakit tu) lalu pekara ti dikemeratka kitai iya nya nentuka proses vaksinasyen dipejalaika enggau lanchar sereta ngarap ulih nembuka pengawa nuchuk vaksin nya ba ujung bulan Ogos,” pia ku Kaban Kunsil Nengeri Kemena nya.
Ku iya pengudah tagit nya dijapai, kitai ke ngalihka perati ngagai program Pelin Mulaika Pemanah Menua kena nyikap diri pansut ari pandemik COVID-19 dalam beberapa renggat ti netapka penyampau kes kurang ari 4,000 ungkup renggat keterubah.
“Tentu KPI (petunjuk prestasi utama)Sarawak kurang ari 300 lebih, ny a baru kitai bejakuka pasal renggat ti nangkanka nya,” ku iya.
Maya ke nemuai nya, iya disempulang Pemesai Opis Pengerai Bagi Menua Bintulu Dr Melvin Chung, Sapit Residen Bahagian Bintulu Hussaini Hakim ngarika Residen, Jack Aman Luat, Managing Direktor ke mega Ketuai Pemesai Eksekutif Malaysia LNG Group of Companies dan Petronas LNG 9 Sdn Bhd Mohamed Syazwan Abdullah @ Laga Jenggi.
Ketuai Menijar Kanan Petronas Carigali Sdn Bhd-Sarawak Gas, Peter Majid Tandom dan Ketuai Menijar Kumpulan Procurement Bintulu, Baharin Hj Osman.