Anda di sini

Anang malu nambaika menira burak enti amat begunaka bantu

Advertisement

SIBU: Mensia mayuh tauka ketuai raban bansa patut nerima inisiatif  nambaika menira burak ti nyadi  kelai begunaka bantu, sereta anang berasai  malu.

Chairman Gerempung Bansa Dayak Sarawak (SDNU) Sibu Chambai Lindong madah, nengah chara nya bantu lalu ulih terus diberi ngagai sida.  

“Tambai menira burak nya mai reti begunaka bantu lengkas kena neruska pengidup sida,” ku iya lebuh dirandau ditu, kemari.

Chambai nemu, mayuh orang napi pemar ba pengidup berindik ari Atur Nagang Pemindah (PKP) ti diteritka.

Taja pia, bisi sekeda nya agi berasai malu minta bantu taja pan pengidup sida tusah.  

“Aku nyukung inisiatif nambaika menira burak nya ngambika sida ulih neruska pengidup, laban aku nemu bisi ke berasai malu madahka gaya penusah pengidup diri,” ku iya.

KuChambai, iya bisi peneleba mantu orang ke tusah kenyau ari PKP keterubah endar diteritka kena 18 Mac taun siti nyin tadi.

Ku iya, sekumbang timpuh, atur mindah betagang ba renggat ke bebida udah ngujungka mayuh sektor udah ditutup, ti lalu ngeruga jalai penatai pemisi orang ke bisi kaul enggau sektor nya.

Ku iya, tebal agi sida tu kereja kunterik, bekereja ba kedai nyual pemakai enggau kedau nyual gari.

“Nya alai, enti bisi bisi menira burak, tau gitang, laban nya ngemuntang agi ngiga endur sida.

“Kebuah pia, laban nadai address tauka palan sida diau kelebih agi ti diau ba rumah pekereja, ngasuh orang mar meri bantu ngagai sida,” ku iya.

Ku iya baru, iyar ke tisi dulu asai malu nya, laban menira burak nya diatu dianggap kelai ke beguna amat, ngambika  orang ke ngelingi kita nemu bisi orang ti amat begunaka bantu.

Advertisement