Anda di sini

22 bungkus pemakai ungkup tiga rumah panjai ti kena HQO

Advertisement
 Paulus (dua kiba) nyuaka pek pemakai ngagai Andria, lalu sama bisi dipeda Wan Hasif (kiba) sereta Jimmy di Kampung Merasam, Pandaruan.
UNGKUP KITA: Paulus (dua kiba) nyuaka pek pemakai ngagai Andria, lalu sama bisi dipeda Wan Hasif (kiba) sereta Jimmy di Kampung Merasam, Pandaruan.

LIMBANG: Bisi 22 iku peranak di tiga buah rumah panjai ti kena kuarantin di rumah (HQO) nerima bantu pek pemakai bedau lama ti udah.

Bantu pemakai ari Opis Pengintu Pengelantang Komuniti Limbang (JKM) udah disuaka Kaban Kunsil Nengeri (ADUN) Batu Danau Paulus Palu Gumbang ngagai peranak genturung pendiau nya ti bisi kontak semak ngagai kes positif sebedau tu.

Tu ngaul Rumah Madline di Kampung Merutop Tengah, Rumah Suring di Kampung Merasam, Pandaruan enggau Rumah Kalat di Kampung Penganan Gudang.

Bisi 22 bungkus bantu pemakai udah disuaka ngagai raban volunteer di kandang menua Kubong Pandaruan Andria Ujan ti ngarika 14 iku ketuai ruang bilik (KIR) ungkup ketetiga genturung pendiau nya.

Bantu iya nya bekal pemakai baka berau, biskut, gula, pemakai dalam tin, kupi enggau garam ti sepenyampau RM50 ungkup tetiap pek kena nangkup guna ninting hari ti berengkah ari timpuh kuarantin nya diteritka nyentuk timpuh nya abis.

“Kitai ngarapka bantu bekal pemakai ti diagihka tu ulih mantu ngelempungka tating penusah peranak genturung pendiau tu bejalaika HQO,” ku Paulus maya ti nyuaka bantu nya.

Sama bisi nyempulang iya nya Pemesai JKM Limbang Wan Hasif Wan Jamari enggau Pemesai Khas Paulus Jimmy Ngindang Bau.

Ku Paulus nerang, peranak genturung pendiau patut ngasika prosedur operasyen standard (SOP) ti udah ditetapka kena mutuska rentayan COVID-19 lalu ngelalau semua serak komuniti ti ulih ngambika berejista ngulihka vaksin di Palan Betuchuk Vaksin (PPV).

Maya program tu, iya mega udah ngelawa tikas pemansang projek Program Transformasyen Menua Pesisir (RTP) Balai Mayuh Guna ti nyauka tembu lalu pengawa ngaga gerija (agih belanja ari UNIFOR) ti agi dalam pengawa ngaga ba Kampung Semabat, Kubong, Pandaruan.

Advertisement