Anda di sini

Tiga kluster COVID-19 udah tembu timpuh PKPD di Sarawak kemari

Advertisement

KUCHING: Naka kemari, Opis Pengerai Nengeri Sarawak (JKNS) ngenukuka tiga kluster udah abis timpuh bejalaika pentin Atur Nagang Pemindah Diteritka Agi (PKPD), 95 kluster ke agi aktif sereta mayuh ari pelilih menua di Sarawak agi mengkang dalam zon Mirah.

Ba tiga kluster ke udah abis timpuh PKPD ku JKNS, iya nya Kluster Sungai Ranan (Kanowit), Jalai Endap Sawit (sitak Samarahan) enggau Tengah Hulu Gedong di Simunjan.

“Laban beratika nadai agi kes ti bisi di ripot dalam ketetiga kluster tu, timpuh PKPD di kandang endur nya diketuka,” ku JKNS.

Naka kemari mega, bisi 95 kluster ke agi aktif, lalu ari penyampau nya, 16 kluster aktif bisi ngerikod 61 penambah kes baru, sereta 79 kluster nadai ngerikod sebarang penambah kes.

Kelimpah ari nya, nitihka rikod kemari, 29 pelilih di nengeri tu agi mengkang ba zon Mirah, dua (Oren), lapan (Kuning) sereta semina sebuah pelilih menua aja ke Gadung.

Pelilih menua ke dalam status zon Mirah iya nya Saratok, Simunjan, Tebedu, Matu, Julau, Lundu, Telang Usan, Song, Sebauh, Bau, Meradong, Asajaya, Tanjung Manis Tatau, Bukit Mabong, Sri Aman, Pakan, Kanowit, Selangau, Subis, Mukah, Sarikei, Samarahan, Serian, Kuching, Kapit, Bintulu, Miri enggau Sibu .

Pelilih menua ba status zon Oren, Lubok Antu enggau Betong, lalu pelilih menua ti ba zon Kuning,  Kabong, Dalat, Marudi, Beluru, Limbang, Pusa, Belaga enggau Lawas.

Naka kemari, semina Daro aja ke agi Gadung.

Nangkanka nya Komiti Mutarka Penusah Ngenyit Nengeri Sarawak (JPBNS) netapka enam buah genturung pendiau di Tatau enggau Saratok diteritka enggau Atur Nagang Pemindah Diteritka Agi (PKPD) sereta semilan genturung pendiau di Batang Igan di Matu disambung timpuh PKPD.

PKPD udah berengkah digaga kemari (30 Jun ngagai 13 Julai) ke Kuarters Pengereja Pengawa Camp Power Bright (KTS Timber) di Tatau enggau Rh. Amin anak Batot, Sungai Kelawit di Tatau.

Kelimpah ari nya, Rh. Milai, Emplaie Ili, Saratok deka berengkah diterit enggau atur PKPD belabuh ari seharitu (1 Julai) ngagai 14 Julai, iya nya di Rh. Mang, Sg Wong, Roban, enggau Rh. Changgie, Sg Brayang, Roban, kededua sitak menua di Saratok, lalu atur tu mega nyengkau Rh. Ngelai, Sungai Stok di Sarikei (berengkah sehari tu 1 Julai ngagai 17 Julai tu ila).

PKPD mega agi mengkang di sambung di semilan genturung pendiau di Sungai Rasau di Batang Igan, iya nya berengkah ari lusa (3 Julai ngagai 16 Julai) mungkur Rh. Salim anak Unang,  Rh. Judy anak Kudi, Rh. Mathew anak Merang, Rh. Daggang anak Ujang, Rh. Lait anak Ijang, Rh. Chandi anak Kilau, Rh. Putit anak Jugah, Rh. Sadin anak Jeli, enggau Rh. Mador anak Rendah.

Tujuh genturung pendiau di Tatau, Bintulu, Meradong, Julau enggau Serikin udah nembuka PKPD sida iya sekeda nya abis kena 29 Julai lalu bisi mega abis kemari (30 Jun).

Genturung pendiau tu, iya nya Rh Ulen anak Segaya, Ng Tekalit di Tatau (29 Jun), Rumah Sewa Sebelah Kedai MDS Mart Samalaju di Bintulu (29 Jun), Kuarters Pengereja Pengawa Rich Drive di Bintulu (29 Jun), Rh. Lium, Skim B, Bintangor di Meradong (30 Jun), Rh. Linggang, Sg. Rayah, Bintangor di Meradong (30 Jun), Rh. Jalang, Nanga Bayu, Ulu Entaba di Julau (30 Jun) enggau Kampung Serikin, di Bau (30 Jun).

  • oleh
  • Advertisement