Anda di sini

PEDAS udah ngatur program meri bantu pengasih ngagai raban terabai menua

Advertisement
 Pengari PEDAS Bintulu (dua kiba) nyuaka bantu ngagai pengari penerima ba sebuah pos palan operasyen di Bintulu kemari.
PEMERI: Pengari PEDAS Bintulu (dua kiba) nyuaka bantu ngagai pengari penerima ba sebuah pos palan operasyen di Bintulu kemari.

KUCHING: Sebuah gerempung ukai dikuasa perintah (NGO) iya nya Gerempung Dayak Sarawak (PEDAS) udah meri bantu ngagai raban terabai menua ti bejalaika pengawa semanjai timpuh Atur Nagang Pemindah Penuh (Total Lockdown) ba sekeda palan operasyen di nengeri tu.

Ba mengeri Kuching, program pengasih PEDAS tu udah betuaika ketuai pampang John Isot begulai enggau Catherine Charlie ari Lead Tatio Bangkule Rejang (Malaysia) udah nganjung bantu pemakai enggau ai irup ngagai lima bansal penyaga iya nya Palan Operasyen Simpang PGA Batu Kawa, Jalai BDC, Jalai Padang Bilun Stapok, Sungai Maong enggau Sungai Pinang.

Ku John ti mega jurujaku PEDAS madah ngagai Utusan Borneo, program sereta kena Hari Enam tu tadi udah ngaul pampang PEDAS di bagi menua Bintulu enggau Miri ti betuaika Kapten Collin Imran enggau Henry Dugah.

Ku iya, pemeri tu kena ngenang tanggungpengawa sereta pengeransing raban terabai menua dalam bejalaika atur Akta Darurat enggau Atur Nagang Pemindah Penuh ti dipejalaika pengelama sebulan enggau hari bukai pengudah nya.

“Kitai endang ngenang raban penyaga pengelikun ti ari raban soldadu, polis enggau RELA dalam neritka atur nagang pemindah di semua bagi menua kena nagang pengelekai igi penyakit ti ulih nabanka nyawa COVID-19 ari ti terus ngelekai,” ku iya.

“Lebuh kitai ti benung lantang diau di rumah sereta tinduk jenak... Bisi bakih kitai ti bebendar bepanas enggau berujan tawas sereta maalm ketegal ti nyadi terabai kitai nagang pemindah kena nyeliahka pengelekai igi penyakit ti nabanka nyawa tu ulih dikurangka,” ku iya nambah.

Iya mega madahka, nyangka bisi entara kitai ti enda lantang sereta tekeruga ketegal pengawa meresa ba palan operasyen tu tang nya digaga kena mutuska rentayan COVID-19 ari terus ngelekai nyadi igi penyakit ti munuh.

“Beserimbai enggau nya, kitai dekaka mensia mayuh ngasika tetiap jaku tangkan enggau SOP ti dipansutka ari Komiti Mutarka Penusah Ngenyit Nengeri Sarawak (JPBNS) ninting maya kena ngurangka indeks ngagai dua lumur lalu ulih terus nyadi kusung enti dibanding enggau tiga lumur ninting hari,” ku iya nyemetak.

Ku John nandu, PEDAS deka dipeda aktif dalam bejalaika pengawa pengasih betemu enggau komuniti Sarawak kelebih agi lebuh nengeri sereta menua betapi enggau pandemik munuh COVID-19 sereta program ti sebaka deka diatur ninting maya.

Advertisement