KUCHING: Isu suntuk pengajar di nengeri tu bedau nerima timbal rasmi ari Opis Menteri Pengerai Malaysia (KPM) taja pan pekara nya udah suah dikenataika kin.
Opis Menteri Pelajar, Sains enggau Pansik Teknologi (MESTR) nengah penerang berita kemari madah, kelimpah ari nya sida mega udah meri langgur penemu ngambika graduan ti bisi ati nyadi pengajar diambi nyadi pengajar sementara.
Ku iya naka April 2021, Sarawak suntuk 3,385 iku pengajar lalu ari penyampau nya 1,545 iku diguna ba sekula sekondari lalu 1,840 ba sekula primari.
“Kena mutarka penanggul tu, MESTR enggau Opis Pelajr Nengeri Sarawak (JPNS) nyengkaum Institut Pematih Pengajar (IPG) di nengeri tu udah meri langgur penemu awakka ngambi graduan ti deka nyadi pengajar nyadi pengajar sementara.
“Ngambil pengajar sementara tu mesti nengah ‘ujian kelayakan’ (ujian psikometrik) enggau diinterviu JPNS sereta IPG,” ku iya.
Ku opis menteri nya baru, sida udah suah berandauka langgur penemu nya enggau pemesai KPM kenyau ari taun 2019 nyengkaum enggau Menteri Pelajar Kanan kena 2 April 2021.
“Kelimpah ari nya, kami mega udah nantu peminta nya baru nengah surat kena 14 April 2021 ngagai Menteri Pelajar Kanan.
“Langgur penemu nya mega udah dikenataika ngagai Menteri Besai nengah surat kena disain Kepala Menteri kena 6 Mei 2021.
“Taja pia kami bedau nerima timbal rasmi ari KPM, tang ke nyata chara KPM baka ti dibantaika Menteri Kanan endang sebaka enggau laggur penemu ti dikenataika kami,” ku iya nyemetak.
Ngenang sentang pengawa milih tauka ngambi sementara baka ke diperambu, opis menteri semina orang ke pas sereta dipilih deka dipinta enggau praktikum pengelama enam bulan ba sekula, ke alai sida deka dikemataka pengelicha IPG enggau sekula.
“Sida ke ditemu engkeman, amat bisi pengerindu, komited lalu ngembuan penau ke betul deka diasuh ngambi Diploma Pendidikan IPG dalam timpuh setaun setengah nengah chara nambih maya ngajar.
“Udah tembu kus tu, sida ti tetangkupka semua pinta enggau penetap deka diberi Diploma Pendidikan ti ngujungka sida tau dichiri nyadi pengajar telatih DG41 baikka ba sekula sekondari tauka sekula primari.
“Nyema langgur penemu tu diterima KPM, kami arap endar ulih mutarka penanggul suntuk pengajar di serata Sarawak dalam kandang tiga taun ke deka datai,” ku iya.
Berebak enggau nya kena 21 Jun ltu tadi, Ketuai Badan Pimpinan Parti Pribumi Bersatu Malaysia (BERSATU) Sarawak Senator Jaziri Alkaf Abdillah Suffian madahka Sarawak patut matih pengajar kediri empu kena mutarka penanggul suntuk pengajar di nengeri tu jemah ila.
Ku iya, siti mekanisme mesti ditumbuhka kena melabaka utai ke deka nyadi, laban ukai semua pengajar ari nengeri bukai deka dianjung gawa ke nengeri tu.
“Kelimpah ari nya, Opis Menteri Pelajar,Sains enggau Pansik Teknologi Sarawak mega mesti ngambi inisiatif kediri empu nengah chara meri ‘input’ ngagai Opis Menteri Pelajar Malaysia laban sida nemu agi nama utai ke diguna ba kandang menua nya,” ku iya.