Anda di sini

Fitur baru dalam MySejahtera mantu proses vaksinasyen nembiak ti deka nampung pelajar ke menua tasik

Advertisement
 Khairy (kanan) bejaku maya aum media disempulang Dr Adham.
AUM MEDIA: Khairy (kanan) bejaku maya aum media disempulang Dr Adham.

KUCHING: Fitur baru udah diengkah dalam aplikasyen MySejahtera kena mantu bala nembiak ti deka nampung pelajar ngagai menua tasik ngaga semaya betemu ngambika divaksin, pia ku Koordinator Program Imunisasyen Covid-19 Menua, Khairy Jamaluddin.

“Fitur baru tu tau dikena 28 Jun tu lalu tau diakses nengah seksyen ‘Helpdesk’. Tu deka mantu proses vaksinasyen ungkup bala nembiak ti patut divaksin sebedau sida dikemendarka tama sereta nampung pelajar sida di menua bukai.

“Peminta sida deka diproses dalam kandang 10kari lalu status nya tau diperesa sida ba aplikasy en nya empu,” ku iya madah maya aum media ninting minggu Covid-19 Immunisation Task Force (CITF), kemari.

Ku Khairy, sida mesti nyempulangka dokumen ke patut, nyengkaum penerang enrolmen sida ti dikeluarka universiti menua tasik ke deka alai sida nampung pelajar.  

“Dokumen nya mega enda tau enda dibai ngagai palan nuchuk vaksin (PPV),” ku iya.

Ungkup peminta bukai kelimpah ari tuju pelajar baka kereja enggau perubat pemindah ketegal kereja, nya agi dipinta nengah chara nganjung ngagai [email protected].

Berebak enggau nya, Khairy mega madahka Malaysia deka nerima sejita dos vaksin AstraZeneca ke diberi  menua Jepun kena Hari Empat tu.  

Menua mega deka nerima sejuta dos agi vaksin Pfizer-BioNTech ke diberi United States kena Hari Lima,ku iya.

“Bekal vaksin tambah tu deka mantu ngemujurka juluk program imunisasyen menua,” ku iya.

Sama bisi maya aum media nya, Menteri Pengerai Datuk Seri Dr Adham Baba.

Advertisement