LIMBANG: Sarakup Dayak Iban Sarawak (SADIA) Pampang Limbang nyambut manah pengawa perintah nambahka penyampau pengajar ke diambi sereta anang enda ibuhka graduan Jaku Iban di nengeri tu.
Sekretari SADIA Limbang Jimmy Ngindang madah, Opis Menteri Pelajar Malaysia (KPM) patut ngambi graduan Jaku Iban ngambika sida enda tinggal ba pengawa ngambi nengah chara ‘one-off’ pengajar baka ti dipadahka bedau lama udah, kena mutarka penanggul suntuk pengajar di Malaysia.
Jimmy ke mega ex-pengajar madah, nitihka penerang nyentuk taun tu semina bisi 394 iku pengajar Jaku Iban ba sekula primari lalu 119 iku pengajar Jaku Iban di sekula sekondari.
“Penanggul suntuk pengajar subjek Jaku Iban tu meri pengirau ati seretameri empas ngagai pemansang subjek Jaku Iban dalam ba bala nembiak bansa Iban di Sarawak,” ku iya nengah penerang berita ditu, kemari.
Iya mega ngarapka KPM nambahka kuota ngambi pengajar subjek Jaku Iban kelebih agi ba sekula di Limbang, kena ngisi penyuntuk penyampau tubuh pengajar nya diatu.
Ku iya ba sekeda sekula, pengajar subjek Jaku Iban ukai semina ngajar nya aja tang mega ngajar subjek bukai.
SADIA Limbang ku iya, nyambut manah pengawa enggau perambu opis menteri ke deka nambahka agi bala pengajar kelebih agi di Sarawak.
Iklan ngambi pengajar baru deka dibuka kena 7 Julai ba website Opis Menteri Pelajar.
“Nya alai SADIA Limbang minta peranak ditu ke bisi Izajah Sarjana Muda Pelajar enggau ijazah ke bukai, sama enggau minta nyadi pengajar kena ngemujurka juluk pelajar menua,” ku iya.
Ku iya baru, SADIA Limbang ngarapka pengawa ngambi pengajar nya ngena chara ke patut awakka bulih pengajar ke enda amat bisi pengerindu sereta patut ngajar.
“Pekara tu beguna amat kena ngemansangka rebak baru ti ulih besemekih sereta ngembuan mayuh penemu,” ku iya.