Anda di sini

PKP di Sarawak dilanjarka berengkah ari 29 Jun nyentuk 12 Julai

Advertisement

KUCHIING: Atur Nagang Pemindah (PKP) di serata Sarawak dilanjarka berengkah ari 29 Jun nyentuk 12 Julai 2021.

Komiti Mutarka Penusah Ngenyit Nengeri Sarawak (JPBNS) dalam notis bekaul Pelin Mulaika Pemanah Menua ungkup prosedur operasyen standard (SOP) Fasa 1, kena Hari Satu  madah, ari baruh SOP nya mengkang ngenanka pemindah entara pelilih menua ti enda dikemendarka kelimpah servis ke beguna amat sereta bisi permit polis tauka surat ari pengaji sida.

Ku JPBNS ba bagi menua Bintulu, individu dipinta beperesa COVID-19 RT PCR dalam kandang tiga hari sebedau mansa tama garis entara bagi menua.

“SOP mega mengkang ngenanka penyampau kapasiti nyengkaum orang ke deriba kerita diri empu ti ditetapka semina dua iku aja.

“Kapasiti dalam kerita diri empu ba tujuan bgulihka servis nyaga pengerai, berubat, pengelikun enggau penusah ngenyit semina dikemendarka tiga iku aja nyengkaum semaya betemu betuchuk vaksin,” ku iya.

Komiti nya mega madah, semina dua iku aja pengari ari ruang bilik dikemendarka mindah meli pemakai, utai ke diguna ninting hari tauka ubat/penambah diet (enda ngelui ari radius 10km ari endur diau tauka palan ke pemadu semak).

SOP nye mega madah, individu tauka raban individu enda dikemendarka ba palan ke ditapat mensia mayuh berengkah ari pukul 12.01 pagi nyentuk pukul 5 pagi enti nadai kebuah ke berat.

Komiti nya madah, di pelilih Bintulu, pelilih Tatau enggau pelilih Sebauh, individu enda dikemendarka ba palan ke ditapat mensia mayuh berengkah ari pukul 8 malam nyentuk pukul 5 pagi tenti nadai kebuah ke berat.

“Individu ke berisiko tinggi enti ulih anang mindah ari rumah lalu nembiak mit ke beumur 12 taun ke baruh enda dikemendarka ngelawa palan ke ditapat mensia mayuh, palan ke tebuka sereta dedat laban mensia mayuh enti nadai kebuah ke patut,” ku iya.

Ku JPBNS, ari baruh PKP nya mega antara servis ke beguna amat ti dikemendarka beroperasyen nitihka jam ti ditetapka nyengkaum kedai runchit (nyual utai diguna ninting hari), supermarket,palan bebeli barang (semina seksyen barang ke diguna enggau pemakai) sereta pasar awam, pasar basah, pasar borong enggau tamu, mengkang ari baruh jaga opis bekuasa kandang menua.  

Bela dikemendarka beroperasyen kedai perengka, kedai elekterik enggau elektronik (miki enggau servis aja), nungkus enggau nyelak,nyaga pengerai enggau nyual, servis enggau miki automotif sereta perengka pengerai enggau pengelikun.

“Restoren, kedai makai, bansal nyual pemaki, perengka pengankut nyual pemakai, orang ke bedaja ba tisi jalai, orang ke bedaja mindah kin kitu, medan selera, palan orang bedaja, bansal alai makai ba tisi jalai tauka kiosk (enda dikemendarka dine in tauka park & dine) semina dikemendarka dibungkus bai pulai tauka ‘pandu lalu’ tauka pemakai ke dianjung aja.

“Premis nyual pemakai jelu, produk betanam betupi, kedai dobi (nyengkaum dobi ‘self service’), kedai cheremin mata, kedai bup enggau kereban kena nulis sereta ke bukai dikemendarka Opis Menteri Kaunsil Kandang Menua enggau Pengawa Berumah tauka Opis Menteri Dagang Dalam Nengeri enggau Pekara Penguna (KPDNHEP) Sarawak beoperasyen pengudah bulih pemendar ari JPBNS,” pia ku komiti nya.

Advertisement