KUCHING: Sapit Kepala Menteri Tan Sri Datuk Amar Dr James Jemut Masing ngansak raban ke ngaga pemutus di menua tu, nuchuk vaksin COVID-19 ba pekereja industri.
Nengah chara nya ku iya, menua ulih nempa ‘imuniti kelompok’ ti kering ngambika industri ulih beoperasyen baka selama.
Ku Masing, pengawa nutup penuh sektor sosial enggau ekonomi di serata menua tauka ‘total lockdown’ enda ulih munaska rampit COVID-19 enti dibandingka enggau nuchuk vaksin.
“Total lockdown baka ti dipejalaika diatu di serata menua, iya nya chara ke amat ‘selektif’ nengah nutup sekeda kilang.
“Chara ke baka tu enda ulih munaska rampit COVID-19 laban enti Atur Nagang Pemindah (PKP) diketuka, COVID-19 mengkang bisi,” ku Masing madah nengah penerang berita kemari.
Ku iya baru, empas ari Total lockdown deka numbuhka ‘mutan ekonomi’ entara industri, pengasa ati sosial ba mensia mayuh enggau pengeransi netizen ngagai perintah.
Ku Masing, pengawa nuchuk vaksin COVID-19 ti dipejalaika enggau chara agresif di Sarawak ngena chara ‘Betuchuk dulu, baru ngerejista diri’ ba orang ke diau di menua pesisir, endang chara ke betul.
“Asil ari nya, Sarawak ngembuan penyampau pemadu mayuh orang ke udah divaksin di Malaysia.
“Sarawak ke bendar tau enda bejalaika ‘total lockdown’ baka ti dipejalaika di Semenanjung Malaysia, tang laban kitai tu sebagi ari Malaysia, kitai enggai enda pan nitihka chara menua nya,” ku iya.