Anda di sini

Sediaka bantu tauka subsidi kena meli gajet digital, ku Lukanisman

Advertisement
LUKANISMAN
LUKANISMAN

MIRI: Perintah besai patut nyendia sereta meri bantu tauka subsidi kena meli gajet digital dikena bala anak belajar nengah chara online.

Kaban Parlimen Sibuti Lukanisman Awang Sauni madah, sistem ngajar enggau belajar diatu amat bepanggai ba pemansang teknologi multimedia.

“Ukai semina napi Atur Nagang Pemindah (PKP), rayat diatu mega napi siti agi utai ke bukai iya nya penyeranta digital.

“Raban B40 enda ulih nyendiaka perengkaguna gajet ngagai anak sida sereta tinggal ari insentif perintah ti begunaka chara nengah online,” ku iya madah ngagai Utusan Borneo ditu, kemari.

Berebak enggau nya, Lukanisman ngarapka pakej ti besai tu dikemudahka ari sukut meri bantu ngagai raban ti amat begunaka nya.

Sebedau tu, bisi didinga sebana ari apai indai raban B40 ti enda ulih nyendiaka perengkaguna kena anak sida neruska sesi besekula di rumah.

Ukai semina nadai agi jalai penatai pemisi ketegal nadai kereja agi, apai indai mega napi penanggul belanja kena ‘reload’ ngambika ulih ngena Internet.

Pekara tu meri pemar ngagai bala anak raban tu enggau ba sesi ngajar enggau belajar di rumah (PdPR) ti mega tau dikumbai enda nurun besekula.  

“Chara nyadung bantu dikearapka manah agi laban nya udah ngasuh raban ti amat begunaka nya berasai enda puas ati,” ku iya.

Ba pekara bukai ke bekaul, pengawa ngelanjarka PKP 3.0 Fasa Keterubah ku iya, patut diisempulang enggau bantu ti mungkur semua kelebih agi orang ti balat napi pemar ketegal nadai agi jalai ngulihka penatai pemisi, nadai kereja enggau ke bukai.  

“Aku ngarapka perintah meda silik bekaul enggau ngelempungka tating pengidup rayat ba semua renggat.

“Lalu meri moratorium ngagai orang ke nginjau mega patut diberi enggau chara automatik ungkup timpuh tiga bulan agi,” ku iya.

Kelimpah ari nya, perintah besai mesti nyadung bakul pemakai tambah tauka berundingka siti chara nyendiaka baucer meli pemakai tauka ngurangka rega barang pemakai ke diguna ninting hari.

Advertisement