SIBU: Dipelabaka lebih 40 peratus peranak di bagi menua Kapit udah betuchuk vaksin COVID-19.
Taja pia, nyauka sebagi ari 134,800 individu ke beumur 18 taun ke atas ti tau divaksin ba bagi menua nya, diau ba luar menua Kapit.
Sapit Residen Kapit Galong Luang madah, nitihka statistik Opis Ngitung Tubuh Malaysia (DOSM) naka Hari Minggu nyin tadi, bisi 42,754 iku tauka 47.03 peratus tudah betuchuk vaksin dos keterubah.
Bisi 8,557 tauka 9.41 peratus udah udah tembu betuchuk dua dos vaksin COVID-19.
“Berengkah ari kitai ngepunka Program Outreach Vaksinasyen (POV) COVID-19 kelebih agi di menua pesisir ari 14 nyentuk 27 Jun (13 hari), pukul rata dos vaksin ke dituchuk urung 3,280,” ku iya madah nengah Facebook kemari.
Berebak enggau nya, Pemesai Pengerai Kapit Dr Hamidi Sharkawi lebuh ke dirandau madah, menua ke pemadu jauh dilawa sida iya nya Long Singut, Long Unai, Sang Anau enggau Long Busang.
Ku iya, kena ngemujurka POV COVID-19 bala staf baka indu misi, pemesai pengerai enggau lutur ngambi timpuh pejalai pengelama lapan nyentuk 12 jam, nengah jalai kayu batang enggau sungai.
“Tetiap pengereja pengawa Opis Menteri Pengerai Malaysia (KKM) ke enggau ba POV nya mesti kering semengat sereta pechayaka diri empu maya napi pemar.
“Pejalai ke jauh nya ukai semina ngasuh berasai lelak, enda nyamai sereta pedias tubuh laban kelalu lama dalam perengka pengangkut,” ku iya.
Ku iya, ketegal bejalaika tanggungpengawa sereta nentuka rayat ampit magang dituchuk vaksin, sida (staf KKM) tetap nguji ngenataika diri ba endur nya.