KUCHING: Program Imunisasi COVId-19 Menua (PICK) di Palan Betuchuk Vaksin (PPV) Balai Komuniti Kampung Gua, Sri Aman udah nembuka operasyen ungkup tuchuk dos keterubah vaksin COVID-19 bansa Sinovac.
Penulung Pemesai Perubat Bagi Menua Sri Aman Terence Agas madah, PPV tu deka berengkah bejalaika operasyen ungkup dos kedua kena 14 Julai ti deka datai.
PPV Gua tu berengkah kena 23 Jun nyin tadi, ku iya, lalu mekuh ngagai peranak ti diau ba kandang menua Punggu enggau Selepong lalu ngaul penerima vaksin ti datai nengah chara atur semaya enggau ‘walk-in’.
“Bisi 521 pemayuh penerima vaksin COVID-19 udah nerima tuchuk dos keterubah ari pun PPV tu dibuka kena Hari Tiga nyin tadi lalu tembu sehari tu (kemari).
“Bisi 120 penerima vaksin udah datai nengah chara atur semaya lalu mekuh ngagai 70 iku penerima vaksin ti datai terus ba hari kepenudi tu,” ku iya.
Beserimbai enggau tu, Helen Dayak Tawan ti datai enggau laki iya, Rogers Ujai sereta anak Ronin Schumacher Bain ari Entulang Tawa madahka diri andal ati laban udah betuchuk vaksin COVID-19.
Sida sebilik mega beterima kasih ngagai semua raban pengereja pengawa ti bekaul ke udah ngemujurka PICK laban udah meri servis ti pemadu manah ngagai sida lebuh proses betuchuk vaksin dos keterubah tu.
Kelimpah ari nya, Johnycal Girang enggau Walther Jini madahka diri andal sereta lantang ati betuchuk vaksin dos keterubah sida.
Seduai tu iya nya pengereja pengawa Pan Borneo tu mega ngansak sida ti bedau berejista betuchuk vaksin ngambika lengkas ngerejista diri kena nyapai imuniti beraban.